सोल्सार कहिल्यै क्लोप र ग्वार्डिओला जत्तिको हुने छैनन्

काठमाडौं ।  अहिले विश्व फुटबलको चर्चा खालि एकै खेलमा मात्र केन्द्रित छ र त्यो हो, लिभरपुलले इंग्लिस प्रिमियर लिगमा म्यानचेस्टर युनाइटेडलाई हराउनु ।

हराएको भए मात्र केही धेरै ठूलो हुने थिएन, तर जति बेला आफ्नै घरमा ५–० ले पराजित हुन्छ, चर्चा अलि बढी हुने त हुन्छ नै ।

अहिले सबैले आलोचना गरिरहेका पात्र हुन्, क्लबका व्यवस्थापक ओल गन सोल्सार ।

म्यानचेस्टरका पूर्व खेलाडी समेत रहेका सोल्सारले समेत मानेका छन्, यो हार क्लबका लागि पनि अंध्यारो दिनमा रूपमा रहेको छ ।

म्यानचेस्टर र लिभरपुल इंग्लिस फुटबलका सबैभन्दा ठूला प्रतिद्वन्द्वी हुन्, त्यसैले यो खेलको नतिजा धेरै अर्थमा सबैका लागि विशेष हुने गर्छ । सोल्सारले के पनि मानेका छन् भने स्तरीयताको आधारमा म्यानचेस्टर धेरै पछाडि छ ।

यसबीच उनलाई लिएर एउटा निकै चर्को प्रतिक्रिया आएको छ र त्यो रहेको छ, लिभरपुलका पूर्व खेलाडी तथा अचेलका फुटबल पण्डित जिमी कारिघरबाट ।

उनले भनेका छन्, यी म्यानचेस्टरका व्यवस्थापक सोल्सारले जत्तिकै प्रयास गरे पनि उनी कहिले पनि योर्गन क्लोप र पेप ग्वार्डिओला जत्तिको हुने छैनन् ।

सबैलाई थाहा छ, क्लोप लिभरपुलका व्यवस्थापक हुन् भने ग्वार्डिओला म्यानचेस्टर सिटीका । यी दुईलाई क्लब फुटबलका अब्बल प्रशिक्षक मानिन्छ ।

कारिघरले अझ के पनि भनेका छन् भने म्यानचेस्टर जत्तिको क्लबलाई सोल्सार बराबरीको प्रशिक्षकले पुग्दैन । त्यो भन्दा उम्दा प्रशिक्षक चाहिन्छ, नत्र नतिजा निस्कने भनेको अहिलेको हार जस्तै मात्र हो ।

–डेली मेलको सहयोगमा ।