एएफसी यू-२३ एसियन कप छनोटमा नेपालको प्रदर्शन
काठमाडौं । नेपालले भोलि सोमबार इरानसँग प्रतिस्पर्धा गर्दै एएफसी यू-२३ एसियन कप छनोटको यात्रा सुरु गर्दैछ ।
यस पटकको छनोटमा नेपाल समूह ‘बी’ मा आयोजक ताजिकिस्तान, इरान र लेबनानसँगै रहेको छ ।
नेपालले दोस्रो खेल आयोजक ताजिकिस्तानविरुद्ध बिहीबार र अन्तिम खेल लेबनानसँग अर्को आइतबार प्रतिस्पर्धा गर्नेछ ।
खासमा अहिले यू-२३ को रुपमा रहेको प्रतियोगिताको पहिलो संस्करण सन् २०१३ मा एएफसी यू-२२ एसियन कपको रुपमा खेलाइने तय भएपनि सन् २०१४ मा खेलाइएको थियो । तर, त्यसपछिका प्रतियोगिताहरु भने यू-२३ को रुपमा खेलाइने गरिएको छ ।
नेपालले अहिलेसम्म भएका चारवटै छनोट खेलिसकेको छ । पाँचौ पटक छनोट खेल्न लागेको नेपालका प्रमुख प्रशिक्षक बालगोपाल महर्जनले राम्रो नजिता निकाल्न तयार रहेको बताएका छन् ।
तर, इतिहास हेर्दा एएफसी यू-२३ एसियन कपमा नेपालको अघिल्ला छनोट प्रतियोगिताहरु खासै उत्साहजनक भने छैन ।
नेपालले अघिल्ला चारवटै छनोटमा सहभागिता जनाउँदा १४ वटा खेल खेलेको छ । जसमध्ये केवल एउटा खेल जित्दा बाँकी १३ खेलमा पराजय भोगेको छ ।
नेपालले एक मात्र जित सन् २०१२ मा काठमाडौंस्थित दशरथ रंगशालामा बंगलादेशविरुद्ध निकालेको थियो ।
छनोटको पहिलो खेलमै नेपालले ४–१ ले जितेको थियो । तर, त्यसपछि भने नेपालले जितको स्वाद चाख्न सकेको छैन ।
छनोट अन्तर्गत नेपालले उज्वेकिस्तान, अफगानिस्तान र साउदी अरेबियासँग समान दुई–दुई पटक पराजय भोग्दा अन्य सातवटा देशसँग एक–एक खेलमा हार्न पुगेको छ ।
नेपालले उज्वेकिस्तानसँग सन् २०१२ मा ४–२ तथा सन् २०१७ मा २–० ले पराजय भोगेको थियो । त्यसैगरी, अफगानिस्तानसँग सन् २०१५ र सन् २०१९ मा समान २–० गोल अन्तरले पराजित भयो ।
यता साउदी अरेबियासँग २०१५ मा ६–० र २०१७ मा साउदी अरेबियासँग ५–० ले हार व्यहोरेको छ ।
त्यसबाहेक नेपालले सन् २०१२ मा जोर्डनसँग ३–० र यमनसँग १–० ले पराजित हुँदा सन् २०१५ मा इरानसँग ५–० तथा प्यालेस्टाइनसँग ४–०, सन् २०१७ मा लेबनानसँग २–० तथा सन् २०१९ मा कतारसँग ५–० र ओमानसँग १–० को पराजय भोगेको थियो ।
तर, यस पटक प्रशिक्षक महर्जन राम्रो नजिता ल्याउनेमा आशावादी छन् र उनको आशा विश्वासमा बदलिने हो वा आशामै सिमित हुने हो सो सोमबार हुने पहिलो खेलको नजिताले देखाउने छ ।
