राम्रो नतिजाको लागि तयार छौँ : प्रशिक्षक महर्जन

काठमाडौं । नेपाली राष्ट्रिय यू-२३ फुटबल टिमका मुख्य प्रशिक्षक बाल गोपाल महर्जनले एएफसी यू-२३ एसियन कप छनोटमा राम्रो नतिजा निकाल्न तयार रहेको बताएका छन् ।

ताजिकिस्तानमा आइतबार प्रि-म्याच कन्फरेन्समा बोल्दै मुख्य प्रशिक्षक महर्जनले राम्रो नतिजाका लागि टिम तयार रहेको बताएका हुन् ।

विपक्षी टिम राम्रो भएपनि आफुहरुले नतिजाका लागि सक्दो प्रयास गर्ने उनले बताए।

'तपाईले हेर्नुभयो भने हाम्रा तीनै विपक्षीहरू गुणस्तरीय टोली छन् । हामीले वास्तविकतालाई स्वीकार गर्नुपर्छ र हामी राम्रो नतिजाको लागि तत्पर छौं । मेरा केटाहरू र म हाम्रो सक्दो प्रयास गर्नेछु,' प्रशिक्षक महर्जनले भने ।

छनोटमा नेपाल समूह 'बी' मा रहेको छ । नेपालको समूहमा ताजिकिस्तान, लेबनान र इरान रहेका छन् ।

नेपालले समूह चरणको पहिलो खेलमा भोलि सोमबार इरानसँग प्रतिस्पर्धा गर्न छ ।

यस्तै दोस्रो खेलमा ताजिकिस्तानसँग अक्टोबर २८ मा खेल्दा अन्तिम खेल लेबनानसँग अक्टोबर ३१ मा खेल्नेछ ।

प्रशिक्षक महर्जनले साफ च्याम्पियनसिपको कारण टिमले छोटो तयारी मात्र गर्न सकिएको बताए ।  

'प्रशिक्षकको रुपमा छनोटका लागि तयारी गर्न थोरै समय थियो । हामीले एक टोलीको रूपमा केही हप्ता मात्र प्रशिक्षण गर्न सक्यौं,' उनले भने, 'किनभने अधिकांश खेलाडीहरू साफ च्याम्पियनसिपको लागि राष्ट्रिय टोलीमा थिए ।'

कप्तान तथा गोलकिपर अर्पण कार्कीले टिमको तयारी राम्रो रहेको बताए । उनले प्रतिस्पर्धाका लागि टिम तयार भएको समेत बताए ।

'एक टिमको रुपमा हामीले राम्रो ट्रेनिङ गरेका छौँ । इन्डोनेसियासँगको मैत्रीपूर्णले हामीलाई सहयोग गर्यो,' कप्तान अर्पणले भने, 'हामी कडा प्रतिस्पर्धाका लागि तयार छौँ ।'

नेपाली टोलीले तयारी स्वरूप शुक्रबार इन्डोनेसियाको यू-२३ टिमसँग मैत्रीपूर्ण खेल खेलेको थियो ।

गासर सेन्ट्रल स्टेडियममा भएको मैत्रीपूर्ण नेपाल इन्डोनेसियासँग २-० ले पराजित भएको थियो ।

छनोटको यस  समूहको शीर्ष टोलीले एएफसी यू-२३ एसियन कप खेल्नेछन् । यस्तै दोस्रो टोली मध्ये उत्कृष्ट चार टोली पनि यू-२३ एसियन कपमा छनोट हुनेछन् ।

उज्वेकिस्तानमा हुने फाइनल चरणको प्रतियोगिता २०२२ को जुन १ देखि १९ सम्म हुने तालिका रहेको छ।