पुलिसका प्रशिक्षक थापा भन्छन्, 'जितबाट सन्तुष्ट छैन'

काठमाडौं । विभागीय टोली नेपाल पुलिस क्लबले पल्सर सहिद स्मारक 'ए' डिभिजन लिग फुटबलमा विजयी सुरुवात गरेको छ ।

बिहिबार भएको खेलमा पुलिसले जावलाखेल युथ क्लबलाई १–० ले पराजित गर्याे । तर, पुलिसका प्रशिक्षक अनन्त राज थापाले जितबाट सन्तुष्ट नभएको बताएका छन् ।

पोस्ट म्याच कन्फरेन्समा प्रशिक्षक थापाले भने, 'मलाई आफ्नो टोलिले यस्तो खेल पस्किन्छ भन्ने लागेको थिएन । अट्याकिङ लाईनमा हाम्रो केहि कमजोरी भयो त्यसैले सोचे जस्तो खेल पस्किन सकेनौ । आजको नतिजाबाट दुखी छौं ।'

लामो समयबाट तयारी गरेको भएपनि युवा खेलाडीले सोचेको जस्तो नखेलेको प्रशिक्षक थापाले बताए । 'पुलिसको खेल पहिला यस्तो थिएन । हामी दुई महिना देखि तयारीमा छौँ । जुन तरिकाको हाम्रो तयारी थियो सोहि अनुसार खेल पस्किन सके सकेनौ,' थापाले भने ।

यस्तै प्रशिक्षक थापाले आउने दिनमा टोलीको प्रदर्शनमा सुधार गर्ने बताए ।

यता,जावलाखेलका प्रशिक्षक राज कुमार केसीले खेलाडीले सोचेको जस्तो खेल्न नसक्दा पराजित भएको बताए ।