रोनाल्डो बालोन डी'ओरको हकदार

काठमाडौं ।  म्यानचेस्टर युनाईटेडका स्टार खेलाडी क्रिस्टियानो रोनाल्डो यस पटकको बालोन डी'ओरको हकदार रहेको उनका एजेन्ट जोर्ग मेन्डेसले बताएका छन् ।

यस पटक रोनाल्डो बालोन डी'ओर अवार्डको सूचीमा रहेको बेला उनका एजेन्ट मेन्डेसले उनी यसका हकदार रहेको बताएका हुन् ।

सन् २०२१ को प्रदर्शनका हिसाबमा रोनाल्डोसँगै लियोनल मेस्सी, रोबर्ट लेवान्डोस्की र जर्जिन्हो जस्ता खेलाडी बालोन डी'ओररको प्रतिस्पर्धामा रहेका छन् ।

मेन्डेसले यस वर्ष रोनाल्डो अघिल्ला वर्षभन्दा बढी बालोन डी'ओर जित्नका लागि योग्य रहेको दाबी गरे ।

रोनाल्डो आफ्नो खेल जीवनको छैटौं बालोन डी'ओर जित्ने प्रयासमा छन् । र, मेन्डेसलाई यो लाग्छ कि गत सिजनमा रोनाल्डोले केवल एउटा उपाधि कोपा इटालिया  मात्र जितेपनि उनले बालोन डी'ओर जित्नका लागि चाहिने भन्दा बढी गरिसकेका छन् ।

फ्रान्स फुटबलसँग कुरा गर्दै मेन्डेसले रोनाल्डोको नामसँग जोडिएको तथ्यांकले उनका बारेमा सबथोक बोल्ने हुनाले सो तथ्यांक उनलाई सो ट्रफी दिलाउन पर्याप्त हुने बताए ।

रोनाल्डोले पोर्चुगलका लागि १ सय १५ गोल गर्दै  १५ वर्ष पुरानो कीर्तिमान भंग गरेको र यसले रोनाल्डोलाई व्यावसायीक फुटबलको इतिहासमा शीर्ष गोलकर्ता बनाउन सक्ने दाबी गरे ।

 ‘यी सबै उपलब्धिहरु, जसले फुटबलको इतिहासमा सबैभन्दा ठूलो प्रदर्शनको प्रतिनिधित्व गर्छ, अवार्डका लागि निर्णायक हुनुपर्छ, किनकी उनले जुनसकै समयको फुटबलको विश्वकै सर्वश्रेष्ठ खेलाडी रहेको कुरा प्रदर्शन गर्दै आएका छन्,’ मेन्डेसले भने ।