साफको फाइनलमा नेपालले भारतसँग खेल्ने
काठमाडौं । भारत माल्दिभ्समा जारी साफ च्याम्पियनसिप फुटबलको फाइनलमा प्रवेश गरेको छ ।
बुधबार राति राउण्ड रोबिन लिगको अन्तिम खेलमा आयोजक माल्दिभ्सलाई ३-१ गोल अन्तरले पराजित गर्दै भारतले फाइनलमा स्थान बनाएको हो ।
मालेस्थित राष्ट्रिय रंगशालामा भारतलाई जित दिलाउन कप्तान सुनिल क्षेत्रीले दुई गोल गरे । मानबिर सिंहले एक गोल गरे ।
माल्दिभ्सका अलि अस्फाकले एक गोल फर्काए ।
रोमान्चक बनेको खेलको ३३ औं मिनेटमा मानबिरले गोल गर्दै भारतलाई सुरुआती अग्रता दिलाएका थिए ।
तर, खेलको ४५ औं मिनेटमा कप्तान अस्फाकले पेनाल्टीमा गोल गर्दै माल्दिभ्सलाई १-१ गोलको बराबरीमा ल्याए ।
दोस्रो हाफमा भारतका कप्तान सुनिल चम्किए ।
खेलको ६२ औं मिनेटमा सुनिलले गोल गर्दै भारतलाई २-१ को अग्रता दिलाए ।
त्यसपछि खेलको ७१ औं मिनेटमा सुनिलले व्यक्तिगत दोस्रो गोल गर्दै भारतलाई ३-१ को जित दिलाए । भारतका लागि उनको यो ७९ औं गोल हो।
यस्तै खेलको इन्जुरी समयमा सुबासिस बोसले रातो कार्ड पाएपछि भारत अन्तिम केहि समय १० खेलाडीमा समेटिएको थियो ।
यस जितसँगै भारत शीर्ष स्थानमा रहदै फाइनल पुगेको हो ।
भारतले ४ खेलमा ८ अंक जोड्यो ।
अब भारतले उपाधिका लागि नेपालको सामना गर्नेछ ।
फाइनल खेल शनिबार नेपाली समय अनुसार साँझ ८:४५ बजे सुरु हुनेछ ।
नेपाल उपविजेता बन्दै फाइनल पुगेको हो ।
नेपालले बुधबार बंगलादेशसँग १-१ गोलको बराबरी खेल्दै फाइनलमा स्थान बनाएको हो ।
पहिलो पटक फाइनल पुगेको नेपालले ४ खेलमा ७ अंक जोड्यो ।
माल्दिभ्सले भने ६ अंक जोडेर तेस्रो स्थानमा रहेर प्रतियोगिताको अन्त्य गरेको छ ।
यस्तै बंगलादेश ५ अंक जोडेर चौंथो र श्रीलंका १ अंक जोडेर पुछारमा रह्यो ।
