कोम्यानलाई बर्खास्तको डर

काठमाडौं । दबाबमा रहेका बार्सिलोनाका मुख्य प्रशिक्षक रोनाल्ड कोम्यानले आफूलाई बचाउदा बचाउदै थकित भएको बताएका छन् ।

च्याम्पियन्स लिगका पहिलो दुई खेलमा बार्सिलोनाले पराजय भोग्नुका साथै ला लिगामा संघर्षरत रहदा प्रशिक्षक कोम्यान बर्खास्त हुने अवस्थामा पुगेका छन् ।

ला लिगा अन्तर्गत शनिबार एटलेटिको मड्रिडसँगको खेल अघि कोम्यान आफ्नो बार्सिलोनाको भविष्यबारेमा अनभिज्ञ रहनेछन् ।

'कसैले मलाई केही भनेको छैन', कोम्यानले भने । उनले खेलको तयारीका कारण क्लबका अध्यक्ष जोआन लापोर्टासँग भेटघाट नभएको बताए ।

तर, उनले आफूलाई बचाउदा बचाउदै थाकेको र यसको कुनै अर्थ नरहेको प्रतिक्रिया दिए ।

तर एभर्टन र नेदरल्याण्ड्सका पूर्व प्रशिक्षक कोम्यानले अध्यक्ष लापोर्टासँगको सम्बन्धको बारेमा बताउन चाहेन । तर उनीहरुबीचको सम्बन्ध राम्रो नरहेको भन्ने चर्चा चल्दै आएको छ ।

स्टार खेलाडी लियोनल मेस्सीले क्लब छाडेपछि बार्सिलोनाले च्याम्पियन्स लिग अन्तर्गत बेन्फिकासँग ३-०  ले पराजित भयो भने ला लिगामा छैठौ स्थानमा रहेको छ ।