उरुग्वे र पेरुको जित

काठमाडौं। फिफा विश्वकप छनोट अन्तर्गत दक्षिण अमेरिकी छनोटमा उरुग्वेले जित निकालेको छ ।

सोमबार बिहान भएको खेलमा उरुग्वेले बोलिभियालाई ४-२ गोल अन्तरले पराजित गरेको हो ।

उरुग्वेको जितमा जर्जियन डी आरेसकाइटाले दुई गोल गरे । यस्तै फेडेरिको भल्भार्डे र अगस्टिन अल्भारेजले एक एक गोल गरे ।  

बोलिभियाका मार्सेलो मोरेनोले दुई गोल फर्काए ।

यस जितसँगै उरुग्वेले ८ खेलमा १२ अंक जोडेको छ ।

उरुग्वे तालिकाको चौंथो स्थानमा उक्लिएको छ ।

बोलिभिया ६ अंक जोडेर नवौं स्थानमा रहेको छ ।

अर्को खेलमा पेरुले भेनेजुएलालाई १-० ले हराएको छ ।

पेरुको जितमा क्रिस्टियन क्युएभाले निर्णायक गोल गरे ।

थोमस रिनकोनले रातो कार्ड पाएपछि भेनेजुएला १० खेलाडीमा समेटिएको थियो ।

यस्तै पाराग्वेले कोलम्बियासँग १-१ गोलको बराबरी खेलेको छ ।

चिली र इक्वेडरले गोलरहित बराबरी खेल्दै अंक बाडेका छन् ।