सन्दीपले होबार्टबाटै बिग बास खेल्ने

काठमाडौं । नेपाली लेग स्पिनर सन्दीप लामिछानेले होबार्ट हुरिकेन्सबाटै नयाँ सिजनको बिग बास लिग खेल्ने भएका छन् ।

अष्ट्रेलियन फ्रेन्चाईज टिम होबार्टले बिहीबार नयाँ सिजनका लागि सन्दीपको सम्झौता नवीकरण गरिएको जनाएको छ ।

होबार्टले पहिलो अन्तराष्ट्रिय खेलाडीको रुपमा सन्दीपलाई टिममा अनुबन्ध गरिएको जनाएको छ ।

सन्दीपले अघिल्लो सिजन होबार्टबाटै खेलेका थिए । 

सन्दीपले गत सिजन होबार्टका लागि ८ खेल खेल्दै ८ विकेट लिएका थिए ।

त्यसअघि सन्दीपले मेलबर्न स्टार्सबाट बिग बास लिग खेलेका थिए ।  सन्दीप बिग बास लिग खेल्ने पहिलो नेपाली खेलाडी हुन् ।

सन्दीपले यस सिजनको लिगमा उत्कृष्ट प्रदर्शन गर्ने विश्वास लिएको समेत बताएका छन् ।

'गतवर्ष हामीसँग राम्रो समूह थियो । हामीमध्ये धेरै यो वर्ष सँगै खेल्नेछौँ । पुरै सिजन त्यहाँ हुनेमा आशावादी छु,' सम्झौतापछि सन्दीपले भनेका छन्, 'व्यक्तिगत रुपमा बलियो प्रदर्शन गर्दै टिमको सफल वर्षमा योगदान गर्न चाहन्छु ।'

बिग बासको नयाँ सिजन आगामी डिसेम्बर ५ देखि २०२२ को जनवरी २८ सम्म हुने तालिका रहेको छ ।

सन्दीप हाल नेपाली राष्ट्रिय टिमसँग ओमानमा रहेका छन् ।

आईसीसी विश्वकप क्रिकेट लिग–२ अन्तर्गत ओमान र अमेरिकासँगको त्रिकोणात्मक एकदिवसीय सिरिजका लागि नेपाली टिम ओमानमा रहेका छन् ।

सन्दीपले पछिलो समय ठुला फ्रेन्चाईज लिग गुमाएका छन् ।

नेपाली टिमको खेल पर्दा सन्दीपले क्यारेबियन प्रिमियर लिग (सीपीएल) टी–ट्वान्टी खेल्ने छैनन् ।

सन्दीपले भिषा समस्याको कारण इंग्ल्यान्डको द हन्ड्रेड क्रिकेट र भाइटालिटी टी-ट्वान्टी ब्लास्ट क्रिकेट गुमाएका थिए ।