एजेन्सी । स्वीडेनको रुस विश्वकप यात्रा रोचक रह्यो । युरोपियन क्षेत्रको छनोटबाट सिधै विश्वकपमा छनोट हुन् सकेन । तर, स्वीडेनले प्ले अफ खेल्ने मौका पायो ।
स्वीडेनको प्ले अफ प्रतिद्वन्द्वी थियो इटाली । पहिलो लेगमा १ – ० गोल अन्तरले जित निकालेको स्वीडेनले दोस्रो लेगमा इटालीसँग गोलरहित खेल्दै विश्वकप यात्रा तय गर्यो । स्वीडेनसँग स्तब्ध हुँदै चार पटकको विजेता इटाली विश्वकपमा छनोट हुन् सकेन । र, इटाली ५९ बर्षपछि पहिलोपटक विश्वकपबाहिर रह्यो ।
इटालीलाई स्तब्ध बनाएर विश्वकप यात्रा तय गरेको स्वीडेनले आज साँझ दक्षिण कोरियाविरुद्ध प्रतिस्पर्धा गर्दै रुस यात्रा सुरु गर्दैछ । एसियाली पावर हाउस दक्षिण कोरियाविरुद्ध मैदान उत्रदा स्वीडेन आफ्नो सनसनीपूर्ण यात्रालाई कायम राख्न चाहन्छ ।
'कठिन प्रतिद्वन्द्वीविरुद्धको खेलको लागि तयार छौ,' स्वीडेनका प्रशिक्षक जाने एन्डरसनले कोरियासँगको खेलअघि भने, 'हामीलाई थाहा छ कि उनीहरु प्राविधिक रुपमा उत्कृष्ट छन् , छिटो खेल्छन् । हामीले सबै कुरामा ध्यान दिनुपर्छ ।
स्वीडेन युरोपको उत्कृष्ट टोलीमा पर्छन् । यसअघि ११ पटक विश्वकप खेलिसकेको स्वीडेनले पछिल्लो पटक सन् २००६ मा विश्वकप खेलेको थियो । यो पटक स्वीडेनलाई क्वाटरफाइनलमा पुग्ने टोलीको रुपमा हेरिएको छ ।
यता, दक्षिण कोरिया पहिलो खेलमा स्वीडेनलाई स्तब्ध बनाउने लक्ष्यमा हुनेछ । स्वीडेनविरुद्ध दक्षिण कोरियाको इतिहास आफु अनुकुल त् छैन । तर, स्वीडेनविरुद्ध खेल्नुअघि दक्षिण कोरिया आत्मविश्वासी देखिएको छ । रुस यात्रा गर्दा कोरियाको लक्ष्य समूह चरणभन्दा माथि जाने रहेको छ ।
'हामी एक अर्कासँग अपरिचित छौं तर हामी खेलको लागि अनि जित्नको लागि तयार छौं,' कोरियाली प्रशिक्षक शिन टेइ योङले खेलअघि भनेका छन् ।
यसअघि ९ पटक विश्वकप खेलिसकेको दक्षिण कोरियाको यो १० औं विश्वकप हो । दक्षिण कोरियाले विश्वकपको इतिहासमा सेमिफाइनलसम्मको यात्रा तय गरको छ ।
स्वीडेन र दक्षिण कोरियाबीच विश्वकपमा अहिलेसम्म भेट भएको छैन । आजको खेल पहिलो भेट हुनेछ । तर, अन्य भेटमा भने स्वीडेन अघि रहेको छ । हालसम्मको चार भेटमा स्वीडेनले २ जित निकालेको छ भने बाँकी दुई खेल बराबरीका सकिएको छ ।
