साहजादले चितवनबाट ईपीएल खेल्ने
काठमाडौं । अफगानिस्तानका आक्रामक ब्याट्सम्यान मोहम्मद साहजादले चौंथो संस्करणको एभरेष्ट प्रिमियर लिग (ईपीएल) टी-ट्वान्टी क्रिकेट खेल्ने भएका छन् ।
३४ वर्षीय साहजादले चितवन टाइगर्सबाट ईपीएल खेल्ने भएका हुन् ।
चितवनले आइतबार एक विज्ञप्ति निकाल्दै साहजादलाई अनुबन्ध गरिएको जनाएको छ ।
साहजाद यसअघि पनि चितवन टाइगर्समा आवद्ध थिए । तर, कोभिड -१९ को कारण ईपीएल स्थगित हुँदा उनी २०१९ मा नेपाल आएर खेल्न पाएका थिएनन् ।
‘काठमाडौंमा छक्का वर्षा गर्नलाई आत्तुर छु । नेपालका प्रशंसकहरु विश्वकै धैर्यवान प्रशंसक हुन् । चितवनबाट खेलेर सबैलाई मनोरञ्जन प्रदान गर्न तयार छु,’ सम्झौतापछि साहजादले भनेका छन् ।
‘गत वर्ष जहा टुंगिएको थियो, त्यहीबाट साहजादलाई निरन्तरता दिन पाउदा हामी निकै उत्साहित छौं । उनी एक स्थापित अन्तर्राष्ट्रिय क्रिकेटर रहेकाले उनको अनुभवलेटाइगर्सको युवा ब्याटिङ लाइनअपलाई उत्साह र अनुभव प्रदान गर्नेछ,’ चितवनका अप्रेसन डाइरेक्टर विनिता चौधरी भट्टराईले भनिन् ।
चितवनबाट पाकिस्तानका अन्तर्राष्ट्रिय क्रिकेट खेलाडी डानिश अजिजले समेत खेल्ने छन् । चितवनको कप्तानी नेपाली राष्ट्रिय टिमका अलराउण्डर सोमपाल कामीले गर्ने छन् ।
चौंथो संस्करणको ईपीएल क्रिकेट असोज ९ गतेदेखि असोज २३ गतेसम्म टियु क्रिकेट मैदानमा हुनेछ ।
प्रतियोगितामा ६ शहरका फ्रेन्चाइज टिमले सहभागिता जनाउने छन् ।
प्रतियोगितालाई अन्तर्राष्ट्रिय क्रिकेट परिषद् (आईसीसी) र नेपाल क्रिकेट संघ (क्यान) ले मान्यता दिईसकेको छ ।
साविक विजेता ललितपुर प्याट्रीयट्ससंगै भैरहवा ग्ल्याडियटर्स, काठमाडौं किङ्स इलाभेन, पोखरा राइनोज, चितवन टाइगर्स र विराटनगर वारिवर्सले प्रतियोगितामा प्रतिस्पर्धा गर्ने छन् ।
को हुन् साहजाद ?
छक्का प्रहार गर्ने छुट्टै शैली बनाएका विकेटकिपर ब्याट्सम्यान साहजाद अफगानिस्तानलाई क्रिकेटको एउटा शक्ति बनाउदाका प्रमुख खेलाडी हुन् ।
माथिल्लोक्रमका यी दाहिने हाते ब्याट्सम्यानले अफगानिस्तानलाई सन् २०१० देखि चार पटक ट्वान्टी–२० विश्वकपमा पुर्याउदा महत्वपूर्ण भूमिका खेल्दै आएका छन् ।
उनको दक्षता सीमित ओभरको क्रिकेटमा मात्र छैन । क्यानाडाविरुद्ध २०१० को अन्तरमहादेशीय कपमा उनले चौथो इनिङ्समा नटआउट २ सय १४ रन बनाएपछि अफगानिस्तानले ४ सय ९४ रनको लक्ष्य पूरा गरेको थियो ।
साहजादले २०१६ आईसीसी एसोसिएट एन्ड एफिलिएट क्रिकेट वर्षको उपाधि जितेका थिए । यो उपाधि जित्ने अफगानिस्तानका पहिलो खेलाडी हुन् । त्यसको अर्को वर्ष उनले टी-ट्वान्टी अन्तर्राष्ट्रियमा एकैदिनमा दुई अर्धशतक बनाएर दुर्लभ कीर्तिमान हात पारेका थिए ।
दुबईमा डिजर्ट टी-ट्वान्टी च्यालेन्जमा उनले दिउसोको खेलमा ओमान र साँझको खेलमा आयरल्यान्डविरुद्ध अफगानिस्तानलाई विजय दिलाउदा दुबै खेलमा अर्धशतक बनाएका थिए ।
अफगानिस्तानले २०१८ मा भारतविरुद्ध आफ्नो पहिलो टेस्ट खेल्दाका सदस्य हुन् उनी । २००९ मा नेदरल्यान्ड्सविरुद्ध उनले एमस्टलभिनमा बनाएको १ सय १० अफगानिस्तानका खेलाडीको एकदिवसीय अन्तर्राष्ट्रियमा पहिलो शतक थियो ।
सन् २०१८ को एसिया कपमा भारतसँग बनाएको शतक उनको विशेष इनिङ्समा पर्छ । उनले शतक पुरा गर्दा अफगानिस्तानको कुल स्कोर १ सय ३१ रनमात्र थियो । उनको १ सय २४ रनमा अफगानिस्तानले २५२ रन बनाएको थियो । अफगानिस्तानले सो खेल टाईमा टुंग्याएको थियो ।
उनले अफगानिस्तानबाट कुल ८४ एकदिवसीय अन्तर्राष्ट्रिय खेल्दै ६ शतक र १४ अर्धशतकसहित २७२७ रन बनाए । उनको औषत ३३ माथि रहेको छ । त्यस्तै ६५ टी-ट्वान्टी अन्तर्राष्ट्रियमा उनले १३४ माथिको स्ट्राइकर रेटमा झन्डै २ हजार रन बनाएका छन् ।
एकदिवसीयमा अविजित १३१ र टी-ट्वान्टीमा अविजित ११८ रन उनको उच्च स्कोर हो । साहजादसँग बंगलादेश प्रिमियर लिग, पाकिस्तान सुपर लिग, अबुधावी टी-१० लिग, अफगानिस्तान प्रिमियर लिगमा खेलेको अनुभव छ ।
