उपयुक्त प्रस्ताव आए लुकाकुले इन्टर छाड्ने

काठमाडौं । इन्टर मिलानका फरवार्ड रोमेलु लुकाकुले उपयुक्त प्रस्ताव आएको खण्डमा क्लब छाड्ने बताएका छन् ।

उनले राम्रो प्रस्ताव आएमा आफुले क्लब छाड्ने जानकारी इन्टरलाई गराएका छन् ।

लुकाकुलाई लण्डन क्लब चेल्सीले अनुबन्धको प्रयास गरिरहेको छ । प्रिमियर लिग क्लबको ८५ मिलियन पाउण्डको प्रस्ताव इन्टरले अस्विकार गरिसकेको छ ।

लुकाकुकाे अघिल्लो प्रतिक्रियाले बेल्जियमका अन्तराष्ट्रिय फरवार्डलाई क्लबमै राख्न सक्नेमा इन्टर विश्वस्त थियो । लुकाकुले यसअघि आफु इन्टरमा खुसी रहेको बताएका थिए ।

पछिल्लो धारणा अनुसार लुकाकु चेल्सी फर्कन चाहन्छन् । उनले सन् २०११ देखि २०१४ सम्म चेल्सीमा बसेका थिए ।

इन्टरको वित्तिय अवस्था नाजुक छ । त्यसैले लुकाकुलाई चेल्सीसंग बेच्ने प्रक्रियालाई अपरिहार्य मानिएको छ ।

चेल्सी रकम थप गर्दै लुकाकुलाई अर्को प्रस्ताव पठाउने तयारी गरेको छ । यस समर ट्रान्सफरमा चेल्सीले लुकाकुलाई क्लब फर्काउन चाहेको छ ।

चेल्सीले स्पेनिस डिफेन्डर मार्कोस एलान्सोलाई लुकाकु सम्झौताको हिस्साको रुपमा राखेको छ ।

लुकाकुले सन् २०११ देखि २०१४ सम्म चेल्सीबाट खेलेका थिए । तर उनले मात्र १४ खेलमा सहभागी हुने मौका पाए । त्यसपछि उनी एभर्टनमा लोनमा गएका थिए । जहाँ लुकाकुले प्रभावशाली प्रर्दशन गरे ।

उनी क्लबमा पुन फर्कन खोजेका थिए । तर म्यान्चेष्टर युनाईटेडले उनलाई ७५ मिलियन पाउण्डमा क्लबमा अनुबन्ध गरेको थियो ।

बेल्जियमका अन्तराष्ट्रिय खेलाडी सन् २०१९ मा इटालीको सिरि ए क्लब आएका थिए । उनी क्लबको कीर्तिमानी मुल्य ७४ मिलियन पाउण्डमा ५ वर्षका लागि इन्टरसंग सम्झौता गरेका थिए ।