रियलले महँगोमा बेचेका चार खेलाडी

काठमाडौं । रियल मड्रिडले भर्खरै राफेल भरानलाई बेचेको छ, पाँच करोड युरोमा । म्यानचेस्टर युनाइटेड गएका भरान रियलकै इतिहासमा सबैभन्दा महँगोमा बेचेका चौथो खेलाडी भएका छन् ।

 त्यस अगाडि बेचेका अन्य महँगा खेलाडी को को त ? रियल आफै यस्ता खेलाडी किन्न माहिर छ, त्यसैले उसले यस्तै तरीकाले बेचेका खेलाडीको चर्चा पनि रोमाञ्चक छ ।

सन् २०१८ मा रियलले क्रिस्टियानो रोनाल्डोलाई १० करोड ५० लाख युरोमा बेचेको थियो र यो नै उसले अहिलेसम्म बेचेका सबैभन्दा महँगा खेलाडी हुन् । रोनाल्डो युभेन्ट्स गएका थिए ।

त्यसपछि आउँछ, अल्भारो मोराटा । रियलले उनलाई आठ करोड युरोमा चेल्सीलाई बेचेको थियो । यो सन् २०१७ को घटना भयो ।

तेस्रो खेलाडी एन्जेल डि मारिया हुन् । उनलाई रियलले सन् २०१४ मा म्यानचेस्टरलाई नै सात करोड ५० लाख युरोमा बेचेको थियो । यी त भए, सूची ।

यसपल्ट भरानलाई रियलले बेच्नुको पनि खास अर्थ छ र यो हो, क्लब आफै आर्थिक संकटबाट गुज्रिरहेको छ । त्यसैले उनलाई बेचेर आएको पैसा क्लबका लागि निकै राहत हुन सक्छ ।

 भरानले दस वर्ष रियलमा बिताए र उनको अनुपस्थिति टिमको डिफेन्समा धक्का पनि हुन सक्छ । यो त भयो, भावनात्मक कुरा ।

अब आर्थिक कुरा । भरान भर्खर १८ वर्षका थिए, उनलाई रियलले एक करोड युरोमा किनेको थियो । अहिले उनलाई त्यसको पाँच गुणा बढी मूल्यमा बेचेको छ । यसले रियललाई राम्रै नाफा भएको छ ।

–मार्काको सहयोगमा ।