राखेप बोर्ड बैठक स्थगित

काठमाडौं । राष्ट्रिय खेलकुद परिषद् (राखेप)को बोर्ड बैठक स्थगित भएको छ ।

पछिल्लो राजनीतिक अवस्थाका कारण असार ३० गतेका लागि बोलाईएको बोर्ड बैठक स्थगित भएको हो ।

सर्वोच्च अदालतले संसद पुनस्थापना गर्दै नयाँ सरकार गठनको परमादेश जारी गरेसंगै प्रधानमन्त्री ओली नेतृत्वको सरकार बहिर्गमनको अवस्थामा छ ।

ओली नेतृत्वको सरकारका खेलकुद मन्त्री कृष्णगोपाल श्रेष्ठको निर्देशनमा आह्वान गरिएको राखेप बैठक समेत स्थगित बनेको हो ।

राखेप कार्यकारी समितिका सचिव कुलबहादुर थापाले असार ३० गतेको बोर्ड बैठक स्थगित गरिएको खेलपाटीलाई बताए ।

राखेप प्रशासन महाशाखा प्रमुख समेत रहेका थापाले मन्त्रीनै नभएको अवस्थामा बोर्ड बैठक बस्न नसक्ने बताए । उनले नयाँ मन्त्रीको आगमनसंगै बैठकको प्रक्रिया अघि बढ्ने उल्लेख गरे ।

‘मन्त्री नभएको अवस्थामा बैठक बस्ने अवस्था रहेन । तत्काललाई स्थगित भन्दा हुन्छ । नयाँ मन्त्री आएपछि बैठकको प्रक्रिया अघि बढ्छ ।’ उनले भने ।

खेलकुद मन्त्री श्रेष्ठसंग परामर्श गर्दै सदस्य सचिव रमेशकुमार सिलवालले असार ३० को बोर्ड बैठक आह्वान गरेका थिए ।

उनले बैठकका कार्यकारी समितिमार्फत एजेण्डा समेत तय गरेका थिए । वार्षिक बजेट र कार्यक्रम पास गर्नेदेखि नवौं राष्ट्रिय खेलकुदको आयोजनाको एजेण्डा बैठकका लागि तय गरेका थिए ।

सोमबार अदालतको आदेशसंगै बोर्ड सदस्यलाई पठाउन तयार पारिएको पत्रलाई फिर्ता लगिएको छ । सदस्य सचिव सिलवालको निर्देशनमा पत्र फिर्ता लगिएको थियो ।

राखेपको बोर्ड बैठक बस्न नसकेको दुई वर्ष भन्दा बढी समय भएको छ । राष्ट्रिय खेलकुद विकास ऐन २०७७ असार १७ गतेबाट कार्यान्वयनमा आएको थियो । ऐनले राखेप बोर्ड बैठक वर्षको कम्तिमा दुई पटक बस्नुपर्ने उल्लेख गरेको छ । तर ऐन आएको वर्ष दिन पुरा भएपनि बोर्ड बैठक बस्न सकेन ।

राजनीतिक अस्थिरतासंगै ओली नेतृत्वको सरकारमा चार जनाले खेलकुद मन्त्रीको जिम्मेवारी पाए । तर बोर्ड बैठक आह्वानमा कसैले चासो देखाएनन् । खेलकुदको जिम्मेवारी समेत पाएका कृष्णगोपाल श्रेष्ठले बोर्ड बैठकको तयारी गरेका थिए । तर बैठक बस्ने दुई दिन अघि ओली नेतृत्वको सरकारनै ढल्न पुगेको छ ।

राखेपको बोर्ड बैठक बस्न नसक्दा खेलकुद संस्थागत रुपमा सञ्चालन हुन सकेको छैन भने खेलकुदका सरोकालवाला निकाय सुशासन, अपारदर्शीता र जवाफदेहिताको पक्षमा कमजोर देखिएका छन् ।