बागमती प्रदेशद्धारा राष्ट्रिय लिगलाई ५० लाख !

काठमाडौं । बागमती प्रदेश सरकारले राष्ट्रिय लिग फुटबलका लागि ५० लाख रुपैयाँको बजेट विनियोजन गरेको छ ।

अखिल नेपाल फुटबल संघ (एन्फा)ले सञ्चालन गर्ने राष्ट्रिय लिग फुटबल कार्यक्रमका लागि प्रदेश सरकारले ५० लाख रुपैयाँ बजेट विनियोजन गरेको हो ।

प्रदेश सरकारले पहिलो पटक राष्ट्रिय लिगका लागि बजेट विनियोजन गरेको हो ।

एन्फाले आफ्ना कार्यक्रमका लागि प्रदेश सरकारसंग बजेटको व्यवस्था माग गर्दै आएको थियो । सोही अनुसार प्रदेश सरकारले आफ्नो प्रदेशमा सञ्चालन हुने प्रतियोगिताका लागि बजेट विनियोजन गरेको हो ।

प्रदेश खेलकुद विकास समितिका सदस्य सचिव सुर्य भण्डारीले प्रदेशमा हुने राष्ट्रिय लिगमा लागि बजेट विनियोजन गरिएको खेलपाटीलाई जानकारी दिए ।

एन्फाले यस सिजनदेखि ए डिभिजन र राष्ट्रिय लिगलाई संग–संगै सञ्चालन गर्ने तयारी गरेको छ ।

ए डिभिजन असोज ३ गते सुरु हुने निर्णय भईसकेको छ । राष्ट्रिय लिगका लागि कात्तिक ३० गतेको मिति प्रस्तावित छ ।

प्रदेशको खेलकुद कार्यक्रम सञ्चालनमा निकै अघि देखिएको बागमती सरकारले प्रथम प्रदेश स्तरीय खेलकुद प्रतियोगिताका लागि झण्डै २ करोड रुपैयाँ बजेट विनियोजन गरेको छ ।
सदस्य सचिव भण्डारीले प्रदेशको प्राथमिकतामा परेका खेलहरुको यस वर्ष प्रदेश स्तरीय प्रतियोगिता आयोजना गरिने बताए ।

बागमती प्रदेशले खेलकुदको प्राथमिकता निर्धारण गर्दै ९ खेलमा लगानी र नतिजा दिने योजना बनाएको छ । बागमती प्रदेश सरकारको प्राथमिकतामा फुटबल, क्रिकेट, भलिबल, बक्सिङ, तेक्वान्दो, कराँते, एथलेटिक्स, ब्याडमिन्टन र स्विमिङ खेलहरु रहेका छन् ।

‘प्राथमिकता निर्धारण गरिएका खेलहरुको प्रदेश स्तरीय प्रतियोगिताका लागि बजेट विनियोजन भएको छ । त्यसमा केही खेल थप हुने सक्नेछन् । भण्डारीले खेलपाटीसंग भने ।

प्रदेश सरकारले यस वर्ष रेफ्री, प्रशिक्षक तालिमदेखि शाहसीक तथा पर्यटकीय खेलको आयोजना सञ्चालन गर्नेदेखि प्रदेश स्तरीय खेल संघलाई खेल सामाग्री खरिदका लागि समेत बजेट विनियोजन गरेको छ ।

खेल प्राविधिकको क्षमता अभिवृद्धि गर्न तालिक सञ्चालन गर्नेदेखि रसुवामा अल्ट्रा म्याराथुनको सम्भाव्यता अध्ययनका लागि समेत बजेट राखिएको सदस्य सचिव भण्डारीले बताए ।

प्रदेश सरकारले यसअघिनै बजेट भाषणमार्फत कार्यक्रम सार्वजनीक गरेपनि शीर्षक सहितका खेलकुदमा परेका कार्यक्रमको सूचि भर्खरै प्राप्त भएको हो ।