गोपीचन्द्रको माग – घटनाकाे निष्पक्ष छानविन होस्

काठमाडौं । ओलम्पिक खेल्न बञ्चित भएका एथलेटिक्सका खेलाडी गोपीचन्द्र पार्कीले घटनाकाे निष्पक्ष छानविनको माग गरेका छन् ।

अन्तिम समयमा प्रतियोगिताबाट बञ्चित गरेर आफुमाथि अन्याय भएको उल्लेख गर्दै गोपीले आफुलाई न्याय दिन अनुरोध गरेका हुन् ।

म्याराथुन विधामा धेरै आवेदन परेको भन्दै प्रतियोगिताको संघारमा गोपीलाई बाहिर राख्दै एथलेटिक्स विधामा सय मिटर स्प्रिन्टमा सरस्वती चौधरीको नाम सिफारिस गरिएको छ ।

नेपाल एथलेटिक्स संघ, नेपाल ओलम्पिक कमिटि र राष्ट्रिय खेलकुद परिषद्ले बिहिबार संयुक्त बिज्ञप्ती जारी गर्दै निकै कोशिश गरेपनि गोपीलाई ओलम्पिकमा सहभागी गराउन नसकिएको बताएका थिए ।

तर अन्तिम समयमा प्रतियोगिताबाट बञ्चित भएका गोपीले निष्पक्ष छानविन गरेर विस्तृत कुरा बाहिर ल्याउन माग गरेका छन् ।

‘दुनियाँसंग लडेर, धेरै कुरा त्याग गरेर आएको हुँ । अहिलेसम्म धेरै लगानी भएको छ । यसरी मेरो भविष्य डामाडोल पार्न भएन । निष्पक्ष छानविन हुन पर्यो । वास्तविक र विस्तृत कुरा बाहिर आउन पर्यो ।’ उनले खेलपाटीसंग भने ।

गत वर्ष मंसिरमा नेपालगञ्जमा सम्पन्न पिस म्याराथुनलाई ओलम्पिक छनोटको आधार बनाईएको थियो । एथलेटिक्स संघ, ओलम्पिक कमिटि र राखेपका प्रतिनिधिले संयुक्त रोहबरमा भएको सो प्रतियोगिताको उपाधि सहित गोपीचन्द्र ओलम्पिकमा छनोटमा छनोट भएका थिए । सोही अनुसार ओलम्पिक कमिटिले गोपीचन्द्रको नाम टोकियो ओलम्पिकका लागि सिफारिस गरेको थियो । तर अन्तिम समयमा उनकाे नाम काटिएकाे छ । 

प्रतियोगिता सुरु हुनु तीन हप्ता अघि मात्र बढी आवेदन परेको भन्दै गोपीचन्द्रलाई ओलम्पिक खेल्नबाट बञ्चित गरिएको छ ।

‘अहिले म सहिद भए । भोली अर्को शहिद होला । यो सत्य तथ्य जानकारीमा आउन पर्यो । खै त मेरो भविष्य । अब मैले केका लागि खेल्ने त ?’ उनले प्रश्न गरे ।

नेपाल ओलम्पिक कमिटिले बुधबार टोकियो ओलम्पिक खेल्ने खेलाडीलाई स्वास्थ्य मापदण्ड अनुसार होटल सोल्टीमा राखेको थियो । तर गोपीचन्द्रलाई अन्तिम समयमा बोलाईएन ।

बिहिबार मात्र बिज्ञप्ती निकालेर ओलम्पिक, एथलेटिक्स संघ र राखेपले गोपीलाई सहभागी गराउन नसकिएको बक्तव्य सार्वजनीक गरेका थिए ।