गाेपीचन्द्रकाे विषयमा लोकतान्त्रिक खेलकुदको ध्यानाकर्षण

काठमाडौं । नेपाल लोकतान्त्रिक खेलकुद संघले गृष्मकालिन ओलम्पिकमा सहभागी जनाउने खेलाडीको विषयमा भएको गैरजिम्मेवार कार्यप्रति घोर भर्त्सना गरेको छ ।

संघले शुक्रबार विज्ञप्ति जारी गर्दै प्रतियोगिताको संघारमा एथलेटिक्सका गोपीचन्द्र पार्कीलाई सहभागी गराउन नसक्ने भन्दै अन्य खेलाडीलाई प्रतियोगितामा पठाउने विषयमा आफ्नो गम्भिर ध्यानाकर्षण भएको जनाएको हो ।

म्याराथनमा कोटा भन्दा बढी आवेदन परेको भन्दै प्रतियोगिता सुरु हुनु भन्दा तीन हप्ता अघि गोपीचन्द्रलाई बाहिर राख्दै सरस्वती चौधरीलाई ओलम्पिकमा सहभागी गराउने निर्णय भएको छ ।

‘ओलम्पिक सुरु हुनुभन्दा २० दिन अघि मात्रै कोटा परिवर्तन भएको जानकारी पठाएको भन्ने व्यहोराको पत्रमा नेपाल एथलेटिक्स संघका अध्यक्ष, राखेप सदस्य सचिव र नेपाल ओलम्पिक कमिटिका अध्यक्षको सामुहिक हस्ताक्षर सहितको विज्ञप्तीमा दिईएको स्पष्टिकरणले यस विषयलाई अझै शंकास्पद र गैह्र जिम्मेवार कार्य भएको भन्ने पुष्टि गरेको छ ।’ विज्ञप्तिमा भनिएको छ ।

संघले गोपीचन्द्रको सहभागीताका लागि अथक प्रयास गरिएको भन्ने विषयमा तीन पक्षले स्पष्ट सूचना र जवाफदेहीताको पारदर्शिता देखाउन माग गरेको छ ।

‘आफ्नो गल्ती र कमीकमजोरीका कारण यदि कुनै खेलाडीको भविष्यमाथि खेलवाड गरिएको हो भने यो क्षमदायी हुने विषय पक्का होईन । तर्सथ यस विषयमा कहाँ कुन प्रकारको प्रयास कहिलेबाट भएको थियो भन्ने विषयमा स्पष्ट जानकारी खेलाडी, खेलकर्मी र समग्र राष्ट्रलाई जानकारी गराउनुपर्दछ ।’ संघका सचिव मनिष जोशीद्धारा हस्ताक्षरित विज्ञप्तीमा भनिएको छ ।