ओलम्पिकमा नेपालबाट ५ खेलाडी मात्र !

काठमाडौं । यस वर्ष हुने टोकियो ओलम्पिकमा नेपालबाट ५ खेलाडीले खेल्ने टुङ्गो लागेको छ ।

नेपाल ओलम्पिक कमिटि (एनओसी)का अनुसार नेपालबाट टोकियो ओलम्पिकमा खेल्ने खेलाडीको टुङ्गो लागेको हो ।

पौडीका गौरिका सिंह र एलेक्स शाह, एथ्लेटिक्सका गोपिचन्द्र पार्की, सुटिङ्गकी कल्पना परियार र जुडोकी सोनिया भट्टले आसन्न ओलम्पिकमा नेपालको प्रतिनिधित्व गर्नेछन् ।

सुटिङ्गकी कल्पना र जुडोकी सोनियाले वाइल्र्ड कार्डमार्फत ओलम्पिकमा सहभागीता जनाउन लागेका हुन् ।

एनओसीका महासचिव निलेन्द्रराज श्रेष्ठले २९ तारिकसम्म आउने निमन्त्रणाको समय पुरा भएकाले थप वाइल्ड कार्ड अब प्राप्त नहुने बताए ।

‘वाइल्ड कार्ड पाएको भए एनओसीलाई निमन्त्रण आउँछ । आईओसीले २९ तारिकसम्म पुरा हुन्छ भनेको थियो । तर अहिलेसम्म आएन ।’ उनले भने ।

‘आईओसीको छात्रवृत्ति अन्तर्गत खेलाडीलाई ५ सय डलर दिईरहेका थियौं । आईओसीले ५ खेलाडीले ओलम्पिकमा प्रतिनिधित्व गर्ने भएकाले जुन ३० बाट अन्य खेलाडीको छात्रवृत्ति रोकिएको छ भनेर पत्र पठाएको छ । यसबाट समेत आसन्न ओलम्पिकमा नेपालबाट ५ खेलाडीले खेल्ने तय भएको बुझ्न सकिन्छ ।’ श्रेष्ठले थपे ।

ओलम्पिक तयारीका लागि आईओसीले सन् २०१९ को मे महिनादेखि ७ खेलका १२ खेलाडीलाई ओलम्पिक छात्रवृत्ति दिएको थियो । सोही अन्तर्गत प्रशिक्षण गर्न र प्रतियोगिता खेल्न खेलाडीले मासिक ५ सय डलर छात्रवृत्ति प्राप्त गर्दै आएका थिए ।

नेपाल एथ्लेटिक्स संघले खेलाडीको नाम सिफारिस नगरेका कारण गोपीचन्द्र पार्कीले यस छात्रवृत्ति प्राप्त गर्न सकेनन् । उनी आफ्नै खर्चमा ओलम्पिकको तयारी गरिरहेका छन् ।

ओलम्पिकमा ५ खेलाडीले प्रतिनिधित्व गर्ने भएपछि बाँकी खेलाडीले प्राप्त गर्दै आएको छात्रवृत्ति आज बुधबारबाट रोकिनेछ ।

कोभिड महामारीका कारण ओलम्पिकले विभिन्न खेलमा वाइल्ड कार्डको निर्धारण गरेको थियो । सुटिङ्ग र जुडोमा धेरै कोटा निर्धारण गरेका कारण नेपालबाट समेत दुई खेलाडी सहभागी हुने पक्का भएको छ ।

विश्व खेलकुदको महाकुभ्भ मेला यस वर्षको ओलम्पिक जापानको टोकियोमा जुलाई २३ बाट अगष्ट ८ सम्म सञ्चालन हुदैछ ।