आर्मीविरुद्ध संघर्षपुर्ण जित निकालेको न्यु डायमण्ड सेमिमा

काठमाडौं । आदीअवादी महिला लिग भलिबलमा न्युडायमण्डले विजयी सुरुवात गरेको छ । आईतबार भएको समुह चरणको खेलमा न्युडायमण्डले आर्मीविरुद्ध संघर्षपुर्ण ३–२ को सेटमा जित निकालेको हो ।

पहिलो सेट न्युडायमण्डले २५–१५ ले जितेपनि आर्मीले दोस्रो सेट २५–२२ र तेस्रो २५–१८ ले जित्दै खेल आफ्नो पक्षमा पारेको थियो । तर चौथो सेट २५–२२ ले जितेर खेलमा उत्कृष्ट पुनरागमन गरेको न्युडायमण्डले अन्तिम सेट १५–११ ले हात पार्यो ।

प्रतियोगिताको पहिलो खेलमा चितवन टाईगर्सले आर्मीलाई ३–० को सेटमा पराजित गरेको थियो । समुह 'ए' अन्तर्गतको खेलबाट चितवन र न्युडायमण्डले समान ३÷३ अंक जोडेका छन् । जितसंगै न्युडायमण्ड सेमिफाइनलमा प्रवेश गरेको छ ।

आर्मी भने प्रतियोगिताबाट बाहिरिएको छ ।आर्मी दुवै खेलमा पराजित हुदै अंक विहिन छ ।

समूह 'ए' को समूह बिजेता भने न्युडायमण्ड र चितवनबीचको खेलले तय गर्नेछ । चितवन पनि सेमिफाइनलमा पुगिसकेको छ ।

नेपाल भलिबल संघ र आदीअवादी फाउन्डेसनको आयोजनामा संचालन भएको दोश्रो खेलमा एपीएफले जित निकाल्यो । आफ्नो पहिलो खेलमा एपीएफले पुलिसलाई २५–१९,२५–२२ र २५–२० को सोझो सेटमा हरायो ।

समूह बी मा एपीएफ १ खेलबाट र पुलिसले २ खेलबाट समान ३–३ अंक बनाएका छन् ।

भलिबलको इतिहासमा सर्वाधिक पुरस्कार राखीको एभिएल बिजेताले ६ लाख नगद प्राप्त गर्ने छ । त्यस्तै उपबिजेताले ३ लाख र तेश्रो हुनेले १ लाख ५० हजार प्राप्त गर्ने छन् । प्रतियोगिताको उत्कृष्ट खेलाडीले एक थान स्कुटर र नगद ५० हजार प्राप्त गर्ने छन् ।