काठमाडौं । उपराष्ट्रपति नन्दबहादुर पुनले ओलम्पिकमा नेपालले पदक जित्ने लक्ष्य लिनु पर्ने बताएका छन् ।
नेपाल ओलम्पिक कमिटीले बुधबार आयोजना गरेको 'ओलम्पिक डे'को अवसरमा उपराष्ट्रपति पुनले ओलम्पिकमा नेपालको लक्ष्य पदक जित्ने हुनु पर्ने बताएका हुन् ।
ओलम्पिकमा पदक जित्न नेपाली खेलकुद क्षेत्रले साेही अनुसारको योजना बनाउन आवश्यक रहेको उपराष्ट्रपति पुनले उल्लेख गरे ।
‘खेलाडीले छनोट चरण पार गरेर कहिले ओलम्पिक पुग्ने ? कहिलेसम्म पदक जित्ने हो ? यसको तालिका बनाएर तयारी र लगानी सरकार र ओलम्पिक कमिटिको गम्भिर ध्यानकर्षण गराउन चाहन्छु ।’ उनले भने ।
उपराष्ट्रपति पुनले सबै खेलको नियमित प्रशिक्षणमा ध्यान दिन आग्रह गरे ।
उनले फुटबल र क्रिकेट बाहेकका राष्ट्रिय खेलको नियमित प्रशिक्षण नभएको चर्चा चल्ने गरेको उल्लेख गर्दै सबै खाले राष्ट्रिय खेलको नियमित प्रशिक्षण र पुर्वाधार विकासमा ध्यान दिन आग्रह गरेका हुन् ।
उनले खेलकुद विकासका लागि पुर्वाधार पहिलो सर्त रहेको उल्लेख गर्दै कमजोर पुर्वाधार र न्युनतम सेवा सुविधाका बीच खेलाडीको समुहगत र व्यक्तिगत प्रर्दशन निकै प्रसशनीय रहेको बताए ।
उनले खेलाडीलाई मासिक रुपमा दिने आर्थिक सुविधा निरन्तर नभएको गुनासो आउने गरेको बताउँदै यसको निरन्तरताका लागि विशेष ध्यानकर्षण गराए ।
उनले सिमित स्रोत साधनका बीच खेलाडीले अन्तराष्ट्रिय प्रतियोगितामा राम्रो प्रर्दशन गरेको उल्लेख गर्दै कोभिड चाँडै निको भएर खेल क्षेत्र पुरानै लयमा फर्कने बताए ।
उपराष्ट्रपति पुनले ओलम्पिकमा नेपाली खेलाडीको अहिलेसम्मको प्रदर्शनको समीक्षा हुनु पर्ने समेत बताए ।
‘विश्व खेलकुद क्षेत्रका लागि यो महान दिन हो । ओलम्पिकको इतिहास भनेको समग्र मानव सभ्यताको उचाइ पनि हो ।’ उपराष्ट्रपति पुनले भने ।
कमिटीको मुख्यालय सातदोबाटोमा आयोजित विशेष कार्यक्रममा उपराष्ट्रपति पुनले नेपालका झण्डा झण्डोत्तोलन पनि गरेका थिए ।
कमिटीका अध्यक्ष जीवनराम श्रेष्ठले अन्तर्राष्ट्रिय ओलम्पिक कमिटीको झण्डा पनि भण्डोत्तोलन गरेका थिए ।
ओलम्पियन मुकुन्द श्रेष्ठको नेतृत्वमा रहेको ओलम्पिक खेलाडीको समूहले उपराष्ट्रपतिलाई ओलम्पिक टर्च पनि हस्तान्तरण गरेका थिए ।
कार्यक्रम नेपाल ओलम्पिक कमिटीको आयोजनामा स्पोर्टस फर अल कमिसनको संयोजनमा भएको हो । कमिसनका अध्यक्ष विष्णुगोपाल श्रेष्ठले कार्यक्रमका अवसरमा ओलम्पिक डेको महत्त्वबारे प्रकाश पारेका थिए।
युवा तथा खेलकुद मन्त्रालयका सचिव केदार न्यौपानेले ओलम्पिक डेका अवसर सबै खेलाडीलाई बधाइ दिंदै देशका लागि उच्च प्रदर्शनको अपेक्षा रहेको बताए ।
कार्यक्रममा बोल्दै कमिटीका अध्यक्ष जीवनराम श्रेष्ठले खेलकुदले समाजमा सकारात्मक असर पर्ने र यसले शान्ति, समृद्धि, सद्भावना र विकासका लागि सहयोग गर्ने बताए ।
कार्यक्रममा कमिटीका महासचिव निलेन्द्रराज श्रेष्ठले धन्यवाद ज्ञापन गर्नु हुँदै नेपाली खेलकुद विकासका लागि दीर्घकालीन योजना र लगानी आवश्यक रहेकोमा जोड दिए ।
