मनाङ क्लबद्धारा दैनिक ५ सय जनालाई खाना वितरण  

काठमाडौं । मनाङ मर्स्याङ्दी क्लबले लकडाउनको अवधिमा दैनिक ५ सय जनालाई खाना वितरण गर्ने कार्यको थालनी गरेको छ ।

मनाङका वरिष्ठ उपाध्यक्ष सुशील गुरुङको संयोजकत्वमा क्लबले लकडाउनको अवधिमा दैनिक खाना वितरणको कार्यलाई सञ्चालनमा ल्याएको हो ।

वरिष्ठ उपाध्यक्ष गुरुङले लकडाउनको अवस्था सामान्य नबनेसम्म खाना वितरण कार्यलाई निरन्तरता दिने बताएका छन् ।

गुरुङका अनुसार जेठ २५ गतेबाट राहत कार्यक्रमलाई निरन्तरता दिईएको हो ।

मनाङ मर्स्याङ्दी क्लब, मनाङ समाज सेवा समिति तथा निश्याङ मनाङ उमेन सोसाइटीको संयुक्त आयोजनामा खाना वितरण कार्यक्रम सञ्चालनमा आएको हो ।

वरिष्ठ उपाध्यक्ष गुरुङले दैनिक ४ सयदेखि ५ सय जनासम्म ज्यालादारीमा काम गर्ने, गरिब, दुखी, असाहाय वृद्ध, वृद्धा तथा बालबालिकालाई विशेष प्राथमिकतामा राखेर खाना वितरण गरिएको बताए ।

राहत कार्यक्रमलाई देश तथा विदेशमा रहका मनाङवासीले सहयोग गरेका छन् ।

गुरुङका अनुसार काठमाडौंका विभिन्न ६ स्थानमा खाना वितरण गरिएको छ ।

मनाङ क्लबले आफ्नै शाखा कार्यालय, क्षेत्रपाटी अस्पताल नजिक, भद्रकाली मन्दिर परिसर, असन ईन्द्रचोक तथा मखन क्षेत्र, स्वयम्बु मन्दिर परिसर र कालिमाटी ढल्कु हल हुँदै सोह्रखुट्टेमा खाना विरतण गर्ने गरेको छ । क्लबले अन्य कुनै स्थानमा खानाको समस्या भएमा सम्पर्क गर्न समेत अनुरोध गरेको छ ।

घरेलु फुटबलको सर्वाधिक सफल क्लब मनाङले फुटबलसंगै समाजिक सेवाको कार्यलाई समेत निरन्तरता दिदै आएको छ । मनाङ क्लबले यसअघि समेत लकडाउनको समयमा खाना वितरण लगायतका राहात कार्यक्रम सञ्चालन गरेको थियो । मनाङ घरेलु फुटबलको सर्वाधिक सफल र लोकप्रिय क्लब हो । मनाङले सर्वाधिक ८ पटक लिग उपाधि उचालेको छ ।