काठमाडौं । फिफा वरीयतामा ६८ औं स्थानमा रहेका टोली हो इराक । नेपालको फिफा वरीयतामा नेपाल १ सय ७१ औं स्थानमा रहेको छ ।
फिफाको वरीयता हेर्दा नेपाल भन्दा इराक १०३ औं स्थान माथि छ । तीनै उच्च वरीयता प्राप्त अरेबियन मुलुकविरुद्ध नेपालले आज (शनिबार) उसैको मैदानमा मैत्रीपूर्ण खेल खेल्दैछ ।
इराकको बसरास्थित अल्फायहा अन्तराष्ट्रिय मैदानमा नेपालले घरेलु टिमसँग खेल्नेछ । नेपाल र इराकबीचको खेल नेपाली समय अनुसार राति १०:१५ बजे सुरु हुनेछ ।
नेपाल र इराक सन् २०२२ को कतार विश्वकपको दोस्रो चरण र २०२३ को एसिया कपको छनोट खेलिरहेको टिम हो । त्यसैको तयारी स्वरूप नेपाल र इराकले मैत्रीपूर्ण खेल खेल्न लागेका हुन् । छनोटमा नेपाल समूह 'बी' र इराक समूह 'सी' रहेका छन् ।
नेपालका मुख्य प्रशिक्षक अब्दुल्लाह अलमुताईरी युवा खेलाडी बोकेर मैत्रीपूर्ण र विश्वकप छनोटका लागि निस्किएका छन् । इराकविरुद्धको खेल प्रशिक्षक अलमुताईरीको पहिलो खेल हुनेछ ।
बलियो टिम इराकविरुद्धको खेलमा प्रशिक्षक अलमुताईरीले युवा खेलाडीलाई अनुभव दिलाउन चाहन्छन् । उनले इराकसँगको खेलमा नतिजा भन्दा प्रदर्शनमा जोड दिएका छन् ।
‘आशा छ । हाम्रो युवा टोलीले अनुभव लिने छन् । नजिता भन्दा पनि प्रदर्शनमा जोड दिनेछ,’ इराकसँगको खेल अघि उनले भनेका छन् ।
अलमुताईरीले घरेलु मैदानमा थ्री नेसन्स कप जितेको टोलीबाट १३ खेलाडीलाई टिम बाहिर राखेका छन् । आफ्नो पहिलो भ्रमणमै उनले नयाँ ६ खेलाडीलाई स्थान दिएका हुन् ।
उनले घोषणा गरेको टिमको औषत उमेर २३ दशमलब ४७ रहेको छ । हालको टोलीमा कप्तान किरण कुमार लिम्बु, रोहित चन्द, नवयुग श्रेष्ठ, विशाल राई र सन्तोष तामाङ मात्रै बढी उमेरका खेलाडी हुन् ।
‘कस्तो प्रदर्शन हुन्छ । आफैलाई मुल्यांकन गर्ने र यसलाई भविष्यमा सुधार गर्ने प्रयास हुनेछ,’ अलमुताईरी थप्छन् ।
इराकविरुद्ध नेपालको इतिहास सुखद छैन । अघिल्ला तीन भेटमा नेपालले तीनै भेटमा हार व्यहोरेको छ । एसिया कप विजेता इराक नेपालविरुद्ध सुखद नतिजाको यात्रालाई कायम राख्न चाहन्छ । तर, नेपाली टिमलाई इराकले कमजोर आक्ने छैन ।
नेपाली टिमका कप्तान किरणले इराकसँग खेल्न टिम तयार रहेको र यस खेलले विश्वकप छनोटमा राम्रो गर्न सहयोग मिल्ने बताउछन् ।
‘हामीले राम्रो तयारी गरेका छौँ र यसका लागि तयार छौँ,' कप्तान किरणले भने,’ ‘इराकविरुद्ध खेल्नु हाम्रो लागि ठुलो अवसर हो । यो कुवेतमा हुने विश्वकप छनोटका लागि राम्रो अनुभव हुनेछ ।’
हेड टु हेड -
नेपाल र इराकबीच पहिलो भेट सन् १९८२ नोभेम्बर २३ मा भएको थियो । एसियन गेममा भएको भेटमा इराकले ३-० ले बाजी मारेको थियो ।
सन् २००१ अप्रिल १४ मा भएको दोस्रो भेटमा इराकले ९-१ को जित निकालेको थियो । नेपालको लागि एक मात्रै गोल निराजन रायमाझीले गरेका थिए ।
सन् २००२ मा जर्मनीलाई २-० गोल अन्तरले पराजित गर्दै ब्राजिलले उपाधि हात पारेको फिफा विश्वकप छनोटको खेलमा समेत नेपाल र इराक भिडेका थिए । त्यस भेटमा भने नेपालले दुई गोल गरेको थियो । इराकले त्यसको बदला ४ गोल गर्याे । यस भिडन्तमा नेपालमा हरि खड्का र निराजन रायमाझीले गोल गरेका थिए ।
करिब दुई दशकपछि मैदान उत्रदा दुबै टोलीमा युवा र अनुभवी खेलाडी रहनेछन् । यसबीचमा इराकले एसिया कप समेत जितिसकेको छ । नेपाल भने दक्षिण एसियाली फुटबलमै सिमित छ ।
विश्वकप छनोट -
इराक फिफा विश्वकपको छनोट नजिक रहेको छ । समूह 'सी' बाट ५ खेल खेलिसकेको इराक ११ अंक सहित शीर्ष स्थानमा रहेको छ । उसलाई पछ्याईरहेको बहराईन ९, इरान ६, हङकङ ५ र कम्बोडिया १ अंक रहेको छ ।
इराकले अब बहराईनसँग उसैको मैदानमा पुगेर खेल्नेछ । यस्तै पुछारमा रहेका कम्बोडिया, हङकङ र इरानसँग खेल्दै छनोटका खेल समाप्त गर्नेछ ।
समूह 'बी' मा रहेको नेपालको भने विश्वकपमा छनोट खेल्ने सपना टुंगिसकेको छ । यद्दपी बाँकी तीन खेल जिते दोस्रो स्थानमा रहँदै छनोट हुने सम्भावना भने रहेको छ । नेपालको एसियन कपमा छनोट हुने सम्भावना समेत बाँकी रहेको छ ।
नेपाल समूहको चौंथो स्थानमा रहँदा अष्ट्रेलिया शीर्ष स्थानमा रहेको छ । नेपालले अब कुवेतमा अष्ट्रेलिया, जोर्डन र चाइनिज ताईपेसँग प्रतिस्पर्धा गर्नेछ । एसियाली पवार हाउसविरुद्ध अंक खोस्न सके नेपालले कम्तिमा एसिया कप छनोटको तेस्रो चरणमा स्थान बनाउने छ ।
अब नेपालले जुन ३ मा ताइपे, जुन ७ मा जोर्डन र जुन ११ मा अष्ट्रेलियासँग खेल्नेछ । इराकसँगको मैत्रीपूर्ण खेलपछि नेपाली टोलि कुवेत जानेछन् ।
-1753109306.jpeg)
