काठमाडौं । नेपाली राष्ट्रिय फुटबल टोलीका मुख्य प्रशिक्षक अब्दुल्लाह अलमुताईरीले इराकविरुद्धको खेलमा टिमबाट नतिजा भन्दा राम्रो प्रदर्शन चाहेको बताएका छन् ।
इराकसँगको खेल अघि बोल्दै प्रशिक्षक अलमुताईरीले युवा खेलाडीबाट आफुले नतिजा भन्दा प्रदर्शनलाई जोड दिएको बताएका हुन् ।
नेपालले घरेलु टिम इराकसँग भोलि (शनिबार) मैत्रीपूर्ण खेल खेल्दैछ ।
बसरास्थित अल्फायहा अन्तराष्ट्रिय मैदानमा नेपाल र इराकबीचको खेल नेपाली समय अनुसार राति १०:१५ बजे सुरु हुनेछ ।
'मलाई आशा छ की हाम्रो युवा टोलीका लागि यो सिकाइको अनुभव हुनेछ । नतिजा खोज्नुको सट्टा यो आफैलाई मुल्यांकन गर्ने र भविष्यमा सुधार गर्न प्रयास गर्नु हो,' अलमुताईरीले भने ।
मुख्य प्रशिक्षक अलमुताईरीले यस पटक नेपाली टिममा ठुलो परिवर्तन गरेका छन् । पछिल्लो समय थ्री नेसन्स कपको उपाधि विजेता टोलीबाट उनले १० खेलाडीलाई मात्रै टिममा लिएका छन् । उनले ६ नयाँ खेलाडीलाई टोलीमा अवसर दिएका छन् ।
विश्वकप छनोटको तयारीका लागि नेपालले फिफा वरीयतामा माथिल्लो स्तरको इराकविरुद्ध खेल्न लागेको हो ।
इराकसँगको मैत्रीपूर्ण खेलपछि नेपाली टोलि विश्वकप छनोटका लागि कुवेत जानेछन् ।
छनोटमा नेपालले अष्ट्रेलिया, जोर्डन र चाइनिज ताईपेसँग प्रतिस्पर्धा गर्नेछ ।
अब नेपालले जुन ३ मा ताइपे, जुन ७ मा जोर्डन र जुन ११ मा अष्ट्रेलियासँग खेल्नेछ ।
-1753109306.jpeg)
