काठमाडौं । पहिलो संस्करणको फ्रेन्चाईज फुटबल नेपाल सुपर लिग (एनएसएल) टिम विराटनगर सिटी एफसीका मुख्य प्रशिक्षक यान ललाई एक सिजनको प्रतिबन्ध लगाईएको छ ।
आयोजक नेपाल स्पोर्टस् म्यानेजमेन्ट कम्पनीले बुधबार प्रतियोगिताको आचारसंहिता उलंघन गरेको भन्दै प्रशिक्षक यान ललाई प्रतियोगितामा प्रतिबन्ध गरिएको जनाएको छ ।
एनएसएल अन्तर्गत १९ औं खेलमा ललितपुर सिटीविरुद्धको खेलमा रेफ्रीविरुद्ध आक्रोश पोख्दै भारतीय प्रशिक्षक यान र अफिसियलले खेल अवरुद्द गर्दै खेलाडीलाई मैदान छाड्न लगाएका थिए ।
प्रतियोगिताको प्राविधिक सहयोगी अखिल नेपाल फुटबल संघ (एन्फा) र आयोजक नेपाल स्पोर्टस् म्यानेजमेन्ट कम्पनीले छानबिन गरेपछि यानलाई प्रतिबन्ध गरिएको हो । प्रतिबन्धसँगै उनलाई ५० हजार जरिवाना समेत गरिएको छ ।
विराटनगरका फुटबल निर्देशक सोनम घले र सहायक प्रशिक्षक निशान श्रेष्ठलाई ३–३ खेल प्रतिबन्ध लगाईएको छ ।
यस्तै विराटनगर एफसीलाई १ लाख जरिवाना पनि गरिएको छ ।
प्लेअफ पुग्न दुबै टोलीलाई जित अनिवार्य रहेको खेलमा पहिलो हाफमै १–० गोल अन्तरले पछि परेपछि विराटनगरले मैदानमा अभद्र व्यवहार गरेको थियो । खेलको ३६ औं मिनेटमा अन्जन बिष्टले गोल र ६२ मिनेटमा विमल रानाले दोहोरो अग्रता लिएपछि प्रशिक्षक यान ल र अफिसियलले खेलाडीलाई मैदान छाड्न दबाब दिएका थिए ।
विराटनगरका १० खेलाडीले मैदान छाड्दा स्पेनिस खेलाडी पेड्रो जाभियर मान्जीले भने मैदान छाड्न मानेनन् । केहि समयमै मिडफिल्डर सन्तोष तामाङ पनि मैदान प्रवेश गरेका थिए । ७ मिनेटपछि विराटनगरका खेलाडी मैदान प्रवेश गरेपछि खेल सुरुभएको थियो ।
खेलमा ४–० को जितसँगै ललितपुर प्लेअफमा स्थान बनाएको थियो । यता, प्रतियोगिता अघि पेपरमा बलियो दाबेदारी प्रस्तुत गरेको विराटनगर भने प्लेअफसम्म पुग्न सकेन ।
प्रतियोगिताको उपाधि काठमाडौं रेजर्सले जितेको थियो । उसले फाइनलमा धनगढी एफसीलाई १–० ले हराएको थियो ।
यो पनि ...
फुटबललाई दाग लगाउने खेल
