एजेन्सी । इटालियन सिरी 'ए' फुटबलमा इन्टर मिलानले जित निकालेको छ ।
शनिबार राति भएको खेलमा इन्टरले क्रोटोनलाई २-० गोल अन्तरले पराजित गरेको हो ।
क्रोटोनको मैदानमा इन्टरलाई जित दिलाउन क्रिस्टियन एरिक्सन र आच्रफ हाकिमीले एक एक गोल गरे ।
पहिलो हाफ गोलरहित बराबरीमा सकिएको खेलको ६९ औं मिनेटमा एरिक्सनले गोल गर्दै इन्टरलाई अग्रता दिलाएका थिए ।
त्यसपछि खेलको इन्जुरी समयमा हाकिमीले गोल गर्दै इन्टरलाई २-० को जित दिलाए ।
यस जितसँगै इन्टर सिरी 'ए' को उपाधि नजिक पुगेको छ ।
इन्टरले सन् २०१० पछि सिरी 'ए' को उपाधि जित्न सकेको छैन ।
यस जितपछि इन्टरले दोस्रो स्थानको एटलान्टामाथि १४ अंकको अग्रता बनाएको छ ।
अब एट्लान्टाले अंक गुमाएको खण्डमा इन्टर च्याम्पियन बन्नेछ ।
इन्टरले ३४ खेलमा ८२ अंक जोडेको छ ।
क्रोटोन १८ अंक जोडेर पुछारमा रहेको छ ।
