काठमाडौं । पहिलो संस्करणको नेपाल सुपर लिग (एनएसएल) फुटबलमा बुटवल लुम्बिनी एफसी र विराटनगर एफसीले बराबरी खेल्दै अंक बाडेका छन् ।
शनिबार भएको खेलमा बुटवल र विराटनगरले २-२ गोलको बराबरी खेल्दै अंक बाडेका हुन् ।
त्रिपुरेश्वरस्थित दशरथ रंगशालामा दुई पटकको अग्रता जोगाउन नसक्दा बुटवलले विराटनगरसँग बराबरी खेलेको हो ।
बुटवलका लागि ओमोलाजा नुरिन करिम र लक्ष्मण रुचालले एक एक गोल गरे । विराटनगरका पेड्रो मान्जी र सन्तोष तामाङले एक एक गोल फर्काए ।
रोमान्चक बनेको पाँचौ मिनेटमा बुटवलका आमिर श्रेष्ठको फ्रिकिक विराटनगरका गोलकिपर किशोर गिरिले उत्कृष्ट बचाऊ गरे ।
खेलको छैटौं मिनेटमा ओमोलाजा नुरिन करिमले गोल गर्दै बुटवललाई १-० को अग्रता दिलाए । कर्नरबाट आएको बलमा विराटनगरका डिफेन्डरले क्लियर गर्न नसकेको बललाई पेनाल्टी क्षेत्रमा रहेका करिमले बललाई पोस्टले जाली चुमाए ।
खेलको ३१ औं मिनेटमा बुटवलका विलियम ओपुकुको लामो प्रहार विराटनगरका गोलकिपर किशोर गिरिले मुश्किलले बचाए ।
तर, खेलको ४२ औं मिनेटमा पेड्रो मान्जीले गोल गर्दै विराटनगरलाई १-१ गोलको बराबरीमा ल्याए । एडिलाजा सोमिडेको पासमा करिब २० यार्ड टाढाबाट पेड्रोले उत्कृष्ट गोल गरे ।
पहिलो हाफ बराबरीमा सकिएको खेल दोस्रो हाफमा समेत दुबै टिमले आक्रमण खेल पस्कियो ।
खेलको ६८ औं मिनेटमा लक्ष्मण रुचालले गोल गर्दै बुटवललाई २-१ को अग्रता दिलाए । विलियमको क्रसमा अनमार्क रहेका लक्ष्मणले सहज गोल गरेका हुन् ।
खेलको ९० औं मिनेटमा विराटनगरका पेड्रोको पेनाल्टी बक्स क्षेत्रबाटको हेडर बल पोस्टको माथिबाट गएको थियो ।
तर, खेलको इन्जुरी समयमा सन्तोष तामाङले फ्रिकिकमा गोल गर्दै खेल २-२ को बराबरीमा ल्याए । सन्तोषको फ्रिकिक बुटवलका गोलकिपर विशाल श्रेष्ठले ठम्याउन सकेनन् ।
खेलमा विराटनगरका पेड्रो प्लेयर अफ दि म्याच चुनिए । उनले २५ हजार प्राप्त गरे ।
इमर्जिङ प्लेयर अफ दि म्याच बुटवलका सुमन लामा चुनिए । उनले १० हजार प्राप्त गरे ।
यस बराबरीसँगै बुटवलले शीर्ष स्थानमा उक्लने मौका गुमाएको छ ।
बुटवलले ३ खेलमा ५ अंक जोडेको छ । बुटवल लिगको दोस्रो स्थानमा रहेको छ ।
विराटनगरले ३ खेलमा ४ अंक जोडेको छ । विराटनगर तेस्रो स्थानमा रहेको छ ।
-1747652309.jpeg)
