जिल्ला स्तरीय महिला भलिबल सुरु

मेलम्ची । सिन्धुपाल्चोक जिल्ला स्तरीय महिला भलिबल प्रतियोगिता सोमबारबाट सुरु भएको छ ।

जिल्लाका पाँच पालिकाको सहभागिता रहेको प्रतियोगिता अन्तर्गत पहिलो दिन चार खेल सम्पन्न भएका छन् । पाँचपोखरी थाङ्पाल गाउँपालिकालाई हराउँदै हेलम्बु विजयी भएको छ ।

इन्द्रावती गाउँपालिकालाई हराउँदै चौतारा साँगाचोकगढी नगरपालिका विजयी भएको छ भने मेलम्ची नगरपालिकाले पाँचपोखरी थाङ्पाल गाउँपालिकालाई हराएको छ । चौथो खेलमा हेलम्बु गाउँपालिकाले चौतारा साँगाचोकगढी नगरपालिकालाई हराएको छ ।

सुपर लिगका आधारमा खेलाइएको खेलमा सबै टिम एकअर्कासँग भिड्ने अवसर पाउने मुख्य रेफ्री श्रीराम बोगटीले जानकारी दिए ।

मेलम्ची नगरपालिकाका प्रमुख डम्बर अर्यालले खेलको उद्घाटन गर्दै महिलाहरुलाई हरक्षेत्रमा अगाडि बढाउनुपर्नेमा जोड दिए । उनले महिला भनेपछि हरेक कुरामा हेप्ने चलनको अन्त्य गरी सम्मानजनक जीवन बनाउनका लागि महिलाहरुलाई प्राथमिकतामा राख्नुपर्ने बताए ।

उपप्रमुख भगवती नेपालले उत्साहित हुँदै खेलमा सहभागी हुन खेलाडीहरुलाई शुभकामना दिए ।

हाम्रो टिम मेलम्चीको आयोजना र रेडियो मेलम्चीको सह–आयोजनामा भएको सो खेलका लागि मेलम्ची नगरपालिकाकाले आर्थिक सहयोग गरेको हो ।