काठमाडौं । नेपाल भलिबल संघ (एनभिए)ले रारा बुलबुले क्लबलाई कारबाही गर्ने भएको छ ।
सोमबार बसेको एनभिएको बैठकले रारा बुलबुलेलाई कारबाही गर्ने निर्णय गरेको हो ।
पाचौं संस्करणको एनभिए भलिबल क्लब लिग खेल्न आएका तीन पाकिस्तानी खेलाडीलाई अलपत्र पारेको भन्दै संघले रारा बुलबुलेलाई कारबाही गरेको हो ।
प्रतियोगिताका लागि रारा बुलबुलेले पाकिस्तान राष्ट्रिय टोलीका सदस्य मुराद जिहानसहित तीन खेलाडी अनुबन्ध गरेको थियो ।
प्रकृया नपुर्याएर विदेशी खेलाडीलाई प्रतियोगितामा समावेश गरेको भन्दै रारा बुलबुलेको दर्ता राखेज गर्दै ठगी मुद्धामा कारबाही प्रक्रिया अघि बढाउने संघले निष्कर्श बैठकले निकालेको एक सचिवले खेलपाटीलाई जानकारी दिए ।
यस्तै, बैठकले खेलाडीलाई स्वदेश पठाउन संघले पहलकदमी लिने निर्णय गरेको छ ।
प्रतियोगितामा क्लब तेस्रो स्थानमा रहेको थियो ।
प्रतियोगिताको समापन कार्यक्रममा रारा बुलबुलेले पुरस्कार समेत लिएको थिएन ।
लिग चरणको अन्तिम खेलमा हेल्प नेपाल एपीएफसँग ३-० सेटले पराजित भएपछि बुलबुलेले असन्तुष्टि जनाएको थियो ।
क्लबका अध्यक्ष निलमकुमार शाहीले प्रायोजकबाट प्राप्त रकम समयमा नआउँदा खेलाडीलाई स्वदेश पठाउन नसकिएको खेलपाटीलाई बताए । उनले खेलाडीलाई अलपत्र पारेको विषय सही नभएको दाबी गरे ।
‘दैनिक २०–२५ हजार खर्च गरेर खेलाडीलाई होटलमा राख्ने रहर हैन । प्रायोजकबाट रकम नआउँदा गाह्रो भएको हो ।’ शाहीले भने ।
प्रतियोगिताको उपाधि हेल्प नेपालले जितेको थियो । उसले फाइनलमा विभागीय एपीएफ क्लबलाई ३-० को सेटमा पराजित गरेको थियो ।
महिलातर्फ भने पुलिस क्लबलाई पराजित गर्दै न्यू डायमण्डले उपाधि हात पारेको थियो ।
