पाकिस्तानलाई टी-ट्वान्टी सिरिज

एजेन्सी । पाहुना टिम पाकिस्तानले घरेलु टिम दक्षिण अफ्रीकाविरुद्धको टी-ट्वान्टी क्रिकेट सिरिज जितेको छ ।

सेन्चुरियनमा शुक्रबार राति भएको चौंथो तथा अन्तिम खेलमा दक्षिण अफ्रीकालाई ४ विकेटले पराजित गर्दै पाकिस्तानले सिरिज ३-१ ले आफ्नो बनाएको हो ।

दक्षिण अफ्रीकाले दिएको १ सय ४५ रनको लक्ष्य पाकिस्तानले १९ ओभर ५ बलमा ७ विकेट गुमाएर पूरा गर्यो ।

पाकिस्तानको जितमा फकर जमानले ६० रनको अर्धशतकीय इनिङ्स खेले । यस्तै मोहमद नवाजले अविजित २५ रन जोड्दा कप्तान बाबर आजमले २४ रन बनाए ।

दक्षिण अफ्रीकाका लिजाड विलियम्स र सीसान्डा मागलाले २/१ विकेट लिए ।

यस अघि पहिले ब्याटिङ गरेको दक्षिण अफ्रीकाले १९ ओभर ३ बलमा अलआउट हुँदै १ सय ४४ रन बनाएको थियो ।

दक्षिण अफ्रीकाका रस्सी भानडेर डुसेनले ५२ रनको अर्धशतकीय इनिङ्स खेले । जानेमान मालनले ३३ रन जोड्दा एडिन मार्क्रमले ११ रन बनाए ।

पाकिस्तानका हसन अलि र फाहिम आश्रफले ३/३ विकेट लिए ।