काठमाडौं । नेपाली राष्ट्रिय पुरुष फुटबल टिमको मुख्य प्रशिक्षक अब्दुल्लाह अलमुताइरीले आफ्नो कार्यकालमा नेपाली समर्थकलाई खुसी पार्ने बताएका छन् ।
नेपाली टिमको मुख्य प्रशिक्षक नियुक्त भएपछि बोल्दै प्रशिक्षक अब्दुल्लाहले टिमको प्रदर्शनबाट समर्थकलाई खुसी पार्ने बताएका हुन् ।
'नेपालमा काम गर्न पाउँदा मलाई खुसी लागेको छ । नेपालीहरु वास्तवमै दयालु छन् । म यस कामलाई चुनौतीको रूपमा लिन्छु र हाम्रो खेलसँगै सबै नेपाली समर्थकहरूलाई खुसी पार्ने आशा गरेको छु,' प्रशिक्षक अब्दुल्लाहले भने ।
अखिल नेपाल फुटबल संघ (एन्फा) ले आइतबारबाट कुवेतका प्रो लाइसेन्स प्राप्त प्रशिक्षक अब्दुल्लाहलाई मुख्य प्रशिक्षकको जिम्मेवारी दिएको हो ।
एन्फाले एएफसी कोचिङ इन्स्ट्रक्टर समेत रहेका अब्दुल्लाहलाई एक वर्षको लागि मुख्य प्रशिक्षकको जिम्मेवारी दिएको हो ।
एन्फाले मुख्य प्रशिक्षक बालगोपाल महर्जनको स्थानमा उनलाई नियुक्त गरेको हो । महर्जनले हालै नेपाललाई थ्री नेसन्स कपको उपाधि दिलाएका थिए ।
तर, फिफा विश्वकप छनोटका लागि प्रो लाइसेन्स प्राप्त प्रशिक्षक चाहिने भएपछि एन्फाले अब्दुल्लाहलाई मुख्य प्रशिक्षकको जिम्मेवारी दिएको हो ।
अब उनले विश्वकप छनौटमा नेपालले खेल्न बाँकी रहेको ३ खेल र साफ च्याम्पियनसिपमा नेपाली टिम हेर्ने छन् ।
यस्तै उनले नेपाली टिम राम्रो रहेको बताउँदै थ्री नेसन्स जस्ता थुप्रै उपाधिमा च्याम्पियन बन्न सक्ने बताए ।
'मैले टोलीको खेल थ्री नेसन्स कपमा हेरेको छु । हामीसँग खेलाडीहरूको राम्रो टिम छ र आशा छ कि हामी यस्ता धेरै उपाधिमा सेलिब्रेसन गर्न सक्छौं,' उनले भने।
कतार फुटबल एसोसियसनको सहयोगमा अब्दुल्लाह गत चैत ६ गते नेपाल आएका थिए ।
कुवेती प्रशिक्षक अब्दुल्लाह अनुभवी प्रशिक्षक हुन् । उनले कतारको अल शाहनी फुटबल क्लब यू-२३ र किर्गिस्तान यू-१७ टिमसँग काम गरिसकेका छन् ।
साउदी अरेबिया र कुवेतको क्लबमा पनि उनले काम गरिसकेको एन्फाले जनाएको छ ।
