अब्दुल्लाह राष्ट्रिय फुटबल टिमको मुख्य प्रशिक्षक

काठमाडौं । कुवेतका प्रो लाइसेन्स प्राप्त प्रशिक्षक अब्दुल्लाह अलमुताइरी नेपाली राष्ट्रिय फुटबल टिमको मुख्य प्रशिक्षक नियुक्त भएका छन् ।

अखिल नेपाल फुटबल संघ (एन्फा) ले आइतबार एएफसी कोचिङ इन्स्ट्रक्टर समेत रहेका अब्दुल्लाहलाई मुख्य प्रशिक्षकमा नियुक्त गरेको हो ।

एन्फाले अब्दुल्लाहलाई एक वर्षको लागि मुख्य प्रशिक्षकको जिम्मेवारी दिएको हो ।

एन्फाले मुख्य प्रशिक्षक बालगोपाल महर्जनको स्थानमा उनलाई नियुक्त गरेको हो । महर्जनले हालै नेपाललाई थ्री नेसन्स कपको उपाधि दिलाएका थिए ।

तर, फिफा विश्वकप छनोटका लागि प्रो लाइसेन्स प्राप्त प्रशिक्षक चाहिने भएपछि एन्फाले अब्दुल्लाहलाई मुख्य प्रशिक्षकको जिम्मेवारी दिएको हो ।

नेपाली टिमको मुख्य प्रशिक्षक नियुक्त भएपछि बोल्दै प्रशिक्षक अब्दुल्लाहले टिमको प्रदर्शनबाट समर्थकलाई खुसी पार्ने बताएका हुन् ।

'नेपालमा काम गर्न पाउँदा मलाई खुसी लागेको छ । नेपालीहरु वास्तवमै दयालु छन् । म यस कामलाई चुनौतीको रूपमा लिन्छु र हाम्रो खेलसँगै सबै नेपाली समर्थकहरूलाई खुसी पार्ने आशा गरेको छु,' प्रशिक्षक अब्दुल्लाहले भने ।

अब उनले विश्वकप छनौटमा नेपालले खेल्न बाँकी रहेको ३ खेल र साफ च्याम्पियनसिपमा नेपाली टिम हेर्ने छन् ।

यस्तै उनले नेपाली टिम राम्रो रहेको बताउँदै थ्री नेसन्स जस्ता थुप्रै उपाधिमा च्याम्पियन बन्न सक्ने बताए ।

'मैले टोलीको खेल थ्री नेसन्स कपमा हेरेको छु । हामीसँग खेलाडीहरूको राम्रो टिम छ र आशा छ कि हामी यस्ता धेरै उपाधिमा सेलिब्रेसन गर्न सक्छौं,' उनले भने।

कतार फुटबल एसोसियसनको सहयोगमा अब्दुल्लाह गत चैत ६ गते नेपाल आएका थिए ।

कुवेती प्रशिक्षक अब्दुल्लाह अनुभवी प्रशिक्षक हुन् । उनले कतारको अल शाहनी फुटबल क्लब यू-२३ र किर्गिस्तान यू-१७ टिमसँग काम गरिसकेका छन् ।

साउदी अरेबिया र कुवेतको क्लबमा पनि उनले काम गरिसकेको एन्फाले जनाएको छ ।