ललितपुर-११ द्वारा सुदूरपश्चिमलाई १ सय ८ रनको लक्ष्य
काठमाडौं । ललितपुर मेयर्स-११ ले पहिलो संस्करणको ललितपुर मेयर कप महिला टी-ट्वान्टी क्रिकेट प्रतियोगितामा सुदूरपश्चिम प्रदेश टिमलाई जितका लागि १ सय ८ रनको लक्ष्य दिएको छ ।
टियु क्रिकेट मैदानमा टस जितेर पहिले ब्याटिङ गरेको ललितपुरले २० ओभरमा ५ विकेट गुमाएर १ सय ७ रन बनायो ।
ललितपुरका लागि कन्चन श्रेष्ठले अर्धशतकीय इनिङ्स खेले । अविजित रहेका कन्चनले ६३ रन बनाए ।
यस्तै सुमन खतिवडाले १६ रन जोड्दा अश्मिना कर्माचार्यले १३ रन जोडिन ।
सुदूरपश्चिमकी कविता जोशी, ऋतु कनोजिया र सम्झना खड्काले १/१ विकेट लिए ।
प्रतियोगिताको उद्घाटन खेलमा एपीएफ क्लबले प्रदेश-१ लाई ८ विकेटले हराईसकेको छ ।
प्रतियोगितामा पाँच टिमको सहभागिता रहेको छ।
प्रतियोगिताको विजेताले ३ लाख नगद पुरस्कार प्राप्त गर्नेछ ।
यस्तै उपविजेताले १ लाख ५० हजार पाउने क्यानले जनाएको छ । प्रतियोगिताको सर्वोत्कृष्ट खेलाडीले २५ हजार प्राप्त गर्दा उत्कृष्ट बलर र ब्याट्सवुमनले १५/१५ हजार पाउने छन् ।
