काठमाडौं । नेपाल सुपर लिग (एनएसएल) को फ्रेन्चाइज टिम ललितपुर सिटी एफसीले मुख्य प्रशिक्षकमा प्रदिप हुमागाईलाई नियुक्त गरेको छ ।
ललितपुर सिटी एफसीले सोमबार पत्रकार सम्मेलन गर्दै हुमागाईलाई मुख्य प्रशिक्षक नियुक्त गरिएको जनाएको छ ।
हुमागाईसँग 'ए' डिभिजन क्लब थ्री स्टार क्लबको नेतृत्व गरिसकेको अनुभव रहेको छ ।
घरेलु फुटबलसहित युरोपेली फुटबलको अनुभव बटुलिसकेका हुमागाईको नेतृत्वमा क्लबले राम्रो नतिजा निकाल्नेमा क्लब विश्वस्त रहेको जनाएको छ ।
ललितपुरसँगको सम्झौतापछि बोल्दै हुमागाईले आफुलाई गरेर देखाउने समय आएको बताए ।
'यो समय मैले बोल्ने भन्दा गरेर देखाउने समय आएको छ । मलाई नेपाली फुटबलमा केही गर्ने चाहना थियो । त्यो अवसर ललितपुर एफसीले दिएको छ,' उनले भने, 'टिम राम्रो बनेको छ । खेलाडी सबै उत्साहित छन् । हामी छिटै प्रशिक्षण सुरु गर्ने छौँ ।'
ललितपुरले यस अघि नै राष्ट्रिय टिमका सदस्य अन्जन विष्टलाई मार्की खेलाडीको रुपमा अनुबन्ध गरिसकेको छ ।
यस्तै ललितपुरले एनएसएल खेल्ने टिम पनि सार्वजनिक गरेको छ ।
ललितपुरले अक्सनबाट मिक्छेन तामाङ, नविन लामा, विनोद गुरुङ, प्रवेश दनुवार, कमल श्रेष्ठ, एरिक विष्ट, विमल राना मगर, रोहित कार्की, सरोज योन्जन, रन्जन विष्ट, निरज बस्नेत, पल्साङ लामा, गौरव बुढाथोकी र अर्पन कार्कीलाई टिममा आबद्ध गरेको थियो ।
नेपाल स्पोर्टस म्यानेजमेन्टले आयोजना गर्ने पहिलो संकरणको लिगमा ७ फ्रेन्चाइज टिमको सहभागिता रहेको छ ।
लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।
त्रिपुरेश्वरस्थित दशरथ रंगशालामा आयोजना हुने लिग बैशाख ११ गतेदेखि २५ गतेसम्म सञ्चालन हुनेछ ।
अखिल नेपाल फुटबल संघ (एन्फा) को प्राविधिक सहयोगमा हुने लिग राउण्ड रोबिनको आधारमा हुनेछ । लिगमा कुल १९ खेल हुनेछ ।
-1753017726.jpeg)
