अनन्त र जुनीलाई वर्ष खेलाडी अवार्ड

नमीन ढकाल

इलाम । राष्ट्रिय फुटबल टोलीका डिफेन्डर अनन्त तामाङ र उसुकी जुनी राई ‘झापा स्पोर्टस् अवार्ड २०७६’ को वर्ष उत्कृष्ट खेलाडी घोषित भएका छन् ।

नेपाल खेलकुद पत्रकार मञ्च (एनएसजेएफ) जिल्ला समन्वय शाखा झापाले शुक्रबार बिर्तामोडमा आयोजना गरेको अवार्डमा झापाका अनन्त र इलामकी जुनी वर्ष उत्कृष्ट खेलाडी घोषित भएका हुन् ।

उनीहरुलाई २०७६ सालमा गरेको नेपाली खेलकुद क्षेत्रमा गरेको उपलब्धिका आधारमा सचित आनन्द सुब्बाको संयोकत्वमा रहेको प्रतिभा छनोट समितिले वर्ष उत्कृष्ट खेलाडीका रुपमा सिफारिस गरेको थियो ।

फुटबलका अनन्तले उत्कृष्ट खेलाडीको अवार्ड जित्दै एक थान मोटरसाइकल प्राप्त गरेका छन् । उनले मनोनयनमा परेका फुटबलरद्वय छिरिङ गुरुङ र सेसेहाङ आङदाम्बेलाई पछि पारेका हुन् ।

अनन्त १३ औं साग स्वर्ण पदक जित्दाको राष्ट्रिय फुटबल टोलीका सदस्य हुन् । उनी गत सहिद स्मारक ‘ए’ डिभिजन लिगमा थ्रीस्टार क्लबबाट खेल्दै उत्कृष्ट डिफेन्डर समेत हुन् ।

अवार्डको महिलातर्फ उत्कृष्ट बर्ष खेलाडी घोषित हुदै इलामकी जुनी राईले एक थान स्कुटर प्राप्त गरिन । उनले जुडोकी देविका खड्का र फेन्सिङकी कमला श्रेष्ठलाई पछि पारिन । नेपाल पुलिस क्लबकी जुनीले १३ औं सागमा उसुमा स्वर्ण पदक प्राप्त गरेकी थिइन । उनी उसु विधातर्फ ‘एनएनआईपिए २०७५÷७६’ की बर्ष उत्कृष्ट खेलाडी समेत हुन् ।

यस्तै वर्ष उत्कृष्ट खेलाडी (युवा) तर्फ फुटबलका रेजिन सुब्बा घोषित भए । उनले नगद २५ हजार र अवार्ड प्राप्त गरे । झापाका रेजिनले मनोनयनमा परेका कबड्डीकी अनुजा कुलुङ र जुडोकी मनिता श्रेष्ठ प्रधानलाई पछि पारेका हुन् । रेजिन १३ औं सागमा स्वर्ण पदक प्राप्त राष्ट्रिय फुटबल टोलीका सदस्य हुन् । उनी सहिद स्मारक लिग बिजेता मच्छिन्द्र क्लबका समेत खेलाडी हुन् । उनी सम्मिलित क्लबले गत वर्ष झापाको सताक्षी गोल्डकप र माईभ्याली गोल्डकपको उपाधि जितेको थियो ।

त्यस्तै वर्ष उत्कृष्ट प्रशिक्षकको अवार्ड करातेका मुख्य प्रशिक्षक मदनकुमार उप्रेतीले जिते । उनले नगद २५ हजार र अवार्ड प्राप्त गरे । झापाका उप्रेतीले मनोनयनमा परेका फुटबलका प्रवेश कटुवाल र पौडीका ओङदेन लामालाई पछि पारे । १३ औं सागमा करातेले १० वटा स्वर्ण पदक जित्दा उनी मुख्य प्रशिक्षक थिए ।

यस्तै पिपल्स च्वाइज अवार्ड महिला राष्ट्रिय फुटबल टोलीकी गोलरक्षक एन्जिला तुम्बापो सुब्बाले जितिन् । विभागीय टोली शसस्त्र प्रहरीमा आवद्ध इलामकी एन्जिलाले नगद २५ हजारसहित ट्रफी प्राप्त गरिन । त्यस्तै लाइफटाइम अचिभमेन्ट अवार्ड ओलम्पियन डम्बर कुँवरलाई प्रदान गरियो । उनले नगद ३५ हजार र अवार्ड प्राप्त गरे । उनले सन् १९८८ को सिओल ओलम्पिकमा एथ्लेटिक विधाबाट प्रतिनिधित्व गरेका थिए । उनले डेक्लाथोनमा राखेको राष्ट्रिय कीर्तिमान अहिलेसम्म कुनै नेपाली खेलाडीले भङग गर्न सकेका छैनन् ।

त्यस्तैगरी खेलकुद क्षेत्रमा विशेष योगदान गरेका बक्सिङ प्रशिक्षक डम्बर लिम्बू र शारिरीक सुगठनका राम दाहाललाई ‘स्पेशल अचिभमेन्ट अवार्ड’ प्रदान गरिएको थियो । उनीहरुले जनही नगद २५ हजार र अवार्ड प्राप्त गरेका थिए ।

०६६ सालमा स्थापना भएको नेपाल खेलकुद पत्रकार मञ्च समन्वय शाखा झापाले पूर्व फुटबलर आशिषविक्रम नेम्वाङको स्मृतिमा विगत चार बर्षदेखि अवार्ड कार्यक्रम आयोजना गर्दै आएको छ ।