आयोजक ग्रामिण बहुउद्देश्य फाइनलमा

हेटौडा । आयोजक ग्रामिण बहुउद्देश्य समाज नेपाल खुल्ला नकआउट फुटबल प्रतियोगिताको फाइनलमा प्रवेश गरेको छ ।

मकवानपुरको बागमती गाउँँपालिकाको झुरझरे खेल मैदानमा मंगलबार भएको सेमिफाइनलमा पारिजात युवा क्लव बकैयालाई ३-१ गोल अन्तरले पराजित गर्दै आयोजक उपाधि नजिक पुगेको हो ।

अब आयोजकले उपाधिका लागि बकैया ५ र करौजे युवा क्लवबीचको विजेतासँग प्रतिस्पर्धा गर्नेछ ।

आयोजकका लागि प्रयास तामाङले खेलको ४९ औं मिनेटमा गोल गर्दै टोलीलाई अग्रता दिलाएका थिए ।

खेलको ६० औं मिनेटमा आयोजकका अमिर श्रेष्ठले गोल गर्दै टिमलाई २-० को अग्रता दिलाए । राज भुसालले ६२ औं मिनेटमा गोल गर्दै टोलीलाई ३-० को अग्रता दिलाए ।

त्यसपछि खेलको ६४ औं मिनेटमा पारिजातका हिसुव थपलियाले गोल गरेपनि आयोजकले ३-१ को जित निकाल्यो ।

खेलको म्यान अफ द म्याच आयोजकका गोलरक्षक गणेश राई चुनिए ।

प्रतियोगिताको विजेता टिमले १ लाख र उप विजेताले ५० हजार नगद सहित शिल्ड, मेडल र प्रमाणपत्र हात पार्नेछन् । प्रतियोगितामा उत्कृष्ट गोलकिपर,स्ट्राईकर, प्लेयर अफ द टुर्नामेण्ट र म्यान अफ द म्याच हुने खेलाडीहरुलाई पनि पुरस्कार प्रदान गरिने व्यवस्था रहेको आयोजकले जनाएको छ ।