बुद्ध क्रिकेट क्लब सेमिफाइनल

बुटवल । बुद्ध क्रिकेट क्लब भैरहवा नेपाल टेलिकम रुपन्देही सुपर लिग क्रिकेट अन्तर्गतको 'ए' डिभिजनको सेमिफाइनलमा प्रवेश गरेको छ ।

भैरहवाको सिदार्थ रंगशालामा सोमबार बुटवलले-११ लाई ७ रनले हराएर बुद्ध सेमिफाइनलमा पुगेको हो ।

बुद्धको जितपछि बुटवल-११ 'ए' डिभिजनमै रहन सफल भएको छ भने बुटवल राइनोज डिभिजन 'बी' मा घटुवा भएको छ ।

पहिले ब्याटिङ गरेको बुद्धले ४७ ओभर २ बलमा अलआउट हुँदै १ सय ९९ रन बनाएको थियो ।

उसका लागि रिजन प्रजुले ३५ रन जोड्दा मिथिलेस यादवले २९ रन बनाए ।

अमित अग्रहरीले २४ रन जोडे । बुटवल-११ का सुधन श्रेष्ठ र प्रकास केसीले ३/३ विकेट लिए ।

जवाफमा बुटवल-११ ले ४४ ओभर २ बलमा अलआउट हुँदै १ सय ९२ रन बनाएको थियो ।

उसका लागि सोनु तामाङले ४८ रन जोड्दा हिमाल पुनले ४३ रन बनाए । इशान पाण्डेले २५ रन जोडे ।

बुद्धका अमित अग्रहरीले ३ विकेट लिए ।

प्रतियोगिताको विजेता टिमले ८० हजार रुपैयाँ र ट्रफी तथा उपविजेताले ४० हजार रुपैयाँ र ट्रफी प्राप्त गर्नेछन् ।

यस्तै, म्यान अफ द सिरिजलाई १५ हजार, बेष्ट ब्याट्सम्यान, बेष्ट बलर र उदयीमान खेलाडीलाई ५/५ हजार तथा प्रत्येक दिनको म्यान अफ द म्याचलाई १ हजार रुपैयाँ प्रदान गरिने छ ।