इशान र प्रकाशको अर्धशतकमा बुटवल-११ को जित

बुटवल । नेपाल टेलिकम रुपन्देही सुपर लिग क्रिकेट अन्तर्गतको 'ए' डिभिजनमा बुटवल-११ ले जित निकालेको छ ।

भैरहवाको सिदार्थ रंगशालामा शुक्रबार बुटवलले-११ ले बुटवल राइनोजलाई १ सय १४ रनले हराएको हो ।

पहिले ब्याटिङ गरेको बुटवल-११ ले ३२ ओभर १ बलमा अलआउट हुँदै १ सय ९९ रन बनाएको थियो ।

उसका लागि इशान पाण्डेले ८३ रनको अर्धशतकीय इनिङ्स खेले । यस्तै प्रकाश केसीले ६५ रन जोडे ।

राइनोजका सुभम गमालले ६ विकेट लिए ।

बुटवल-११ ले दिएको २०० रनको लक्ष्यसहित जवाफी ब्याटिङ गरेको राइनोजले अलआउट हुँदै ८५ रन मात्र बनाउन सक्यो ।

उसका लागि सनिल श्रेष्ठले १३ रन जोड्दा सुभम गमालले १२ रन बनाए ।

बुटवल-११ का इशान पाण्डेले ३ विकेट लिए ।

प्रतियोगिताको विजेता टिमले ८० हजार रुपैयाँ र ट्रफी तथा उपविजेताले ४० हजार रुपैयाँ र ट्रफी प्राप्त गर्नेछन् ।

यस्तै, म्यान अफ द सिरिजलाई १५ हजार, बेष्ट ब्याट्सम्यान, बेष्ट बलर र उदयीमान खेलाडीलाई ५/५ हजार तथा प्रत्येक दिनको म्यान अफ द म्याचलाई १ हजार रुपैयाँ प्रदान गरिने छ ।