नेयमार अर्थात ब्राजिली विश्वास

काठमाडौं । युरोपेली क्लबको नजर उनीमा परिसकेका थिएन्  । ब्राजिलियन क्लब सान्तोषमा उनी भखैरै खेल्दै थिए । उनको खेल कौशल हेरेर धेरैलाई लागेको थियो, एक दिन ब्राजिललाई विश्वकपको उपाधि यात्रासम्म डोर्याउने नायक यही हुनेछ ।

त्यो नायक अरु कोही थिएन । उनी थिए, नेयमार । अर्थात जुनियर नेयमार । उनी नेयमारमा सारा ब्राजिलीले बिश्वकपको उपाधि जित्ने विश्वास अडिएको छ । त्यसका लागि स्वयम् नेयमार समेत तयार छन् ।

युरोप छिरेर उनले आफुलाई विश्व फुटबलको उम्दा खेलाडीका रुपमा प्रमाणित गरिसकेका छन् । छिमेकी अर्जेन्टिनाका लियोनल मेस्सीले विश्व फुटबलमा एकछत्र राज गरिरहदाँ ब्राजिलले समेत आफ्ना स्टारलाई दक्षिण अमेरिकी महादेशमा खुम्चाएर राख्न चाहेन ।

स्पेनको धनाड्य क्लब रियल मड्रिड उनलाई कुनै पनि मुल्यमा किन्न चाहन्थ्यो । नेयमारलाई भित्राउन खाली चेक समेत हस्ताक्षर गरेर समेत रियल किन्न तयार भयो । तर, बार्सिलोनामा मेस्सीसँग खेल्ने नेयमारको इच्छाको अगाडी रियलको पैसाको कुनै जोर चलेन । उनी बार्सिलोना आए अनि मेस्सीसँग दोस्ती बढाए ।

मेस्सीसँगको संगत र सहकार्यले उनलाई अझ निखार्दै लग्यो । बार्सिलोनाले समेत मेस्सी पछिको उत्तराधिकारीको रुपमा नेयमारलाई प्रस्तुत गर्यो । बार्साका मुख्य खेलाडी मेस्सी भए । त्यसपछि जोडिन आईपुगे उरुग्वेका लुईस स्वारेज । अनि नेयमार छायाँमा परेजस्तै देखिए ।

समयसँगै नेयमारले मन फेरे, उनले बार्सिलोना छाड्ने निर्णय गरे । कतारी लगानीको फ्रान्सेली क्लब पेरिस सेन्ट जर्मेन (पिएसजी) नेयमारलाई कीर्तिमान मुल्य तिर्न तयार भयो । नेयमार आफै पनि बार्सा छोड्ने मनस्थितिमा थिए । एक अर्थमा उनलाई बार्सिलोना र मेस्सीको छायाँबाट मुक्त हुन थियो । उनलाई विश्वकै सर्वोकृष्ट खेलाडी भएको प्रमाणीत गर्न थियो ।

पिएसजी आएर उनले स्टारडम अनुसारकै प्रर्दशन गरे । चोट बोके । विश्राम लिए । अब फेरी मैदान फर्किएका छन् । हो, नेयमार मैदान फर्किएका छन् ।

नेयमारसँगै ब्राजिलको विश्वास मैदान फर्किएको छ । ब्राजिलको आश र भरोसा मैदान फर्किएको छ । उनै नेयमारको नेतृत्वमा सारा ब्राजिलले विश्वकपको उपाधि जित्ने अठोट लिएको छ । उनी नेयमारलाई ब्राजिलले विश्वकपको उपाधि जिताउने ठुलो भारी बोकाईदिएको छ ।

बिर्सन नहुने तथ्य, चार बर्ष अगाडी ब्राजिल आफ्नै घरेलु भुमिमा जर्मनीसंग ७–१ को पराजित भयो । धेरैलाई लागेको थियो, ब्राजिली फुटबल अब उठ्ने छैन । सायद यो पनि हुन सक्छ, ब्राजिली फुटबलले अब खुट्टा टेक्ने छैन । तर, सबै अनुमान र आरोपलाई जवाफ दिदै ब्राजिल रुसी विश्वकपमा टिकट काट्ने पहिलो राष्ट्र बन्यो ।

सन् २०१४ को विश्वकपमा खतरनाक चोट बोकेका नेयमार ढिलो चाँडो मैदानमात्र फर्किएनन् । संगै लिएर आए, ब्राजिलको विश्वास र भरोसा । फेरी ब्राजिली जनतामा उनले बाँडिदिएका छन्, सपना विश्वकप उपाधिको ।

नेयमार आफैले बाँडेको सपनाको सारथी बन्न सक्लान ?

                                                                                                                       -हिम बिक्रम