धनगढी । सुदूरपश्चिम प्रदेश लिगको उपाधिका लागि निसर्ग स्टार सिटी युवा क्लब र दीपज्योती युवा क्लबले प्रतिस्पर्धा गर्ने भएका छन् ।
अखिल नेपाल फुटबल संघको कार्यक्रम अन्तर्गतको लिगको फाइनलमा कैलालीको सिटी र कञ्चनपुरको जिल्ला च्याम्पियन दीपज्योती टिम भिड्ने भएका हुन् ।
होम एण्ड अवेको आधारमा हुने फाइनल बिहीबार र शनिबार हुनेछ ।
बिहीबार हुने पहिलो लेग खेल महेन्द्रनगर रंगशालामा हुनेछ । दोस्रो लेग धनगढीको जुगेडामा रहेको मनकामना युवा क्लबको मैदानमा हुनेछ ।
प्रदेश लिगको उपाधि जित्ने टोलीले सुदूरपश्चिम प्रदेशको प्रतिनिधित्व गर्दै एन्फा प्रेसिडेन्ट कपमा सहभागिता जनाउनेछ ।
प्रेसिडेन्ट कपमा सात वटै प्रदेशका विजेताहरु भिड्ने छन् । त्यसमा उत्कृष्ट चारमा पर्न सफल भएका चार प्रदेशहरुले राष्ट्रिय लिगमा सहभागिता जनाउनेछन् । सहिद स्मारण ए डिभिजन लिगका उत्कृष्ट ६ र प्रेसिडेन्डट कपका उत्कृष्ट चार गरी १० क्लबले राष्ट्रिय लिगमा सहभागीता जनाउने एन्फाले जनाएको छ ।
यस्तै सुदूरपश्चिम प्रदेश लिगको सम्पूर्ण तयारी पुरा भएको प्रदेश फुटबल संघका अध्यक्ष दिनेश श्रेष्ठले जानकारी दिए । चार लाखभन्दा बढी खर्च लाग्ने अनुमान गरिएको प्रतियोगितामा एन्फाले तीन लाख रकम सहयोग गर्नेछ भने अपुग रकम स्थानीयस्तरबाट व्यहोरिने भएको छ ।
