बायर्न क्लब विश्वकपको फाइनलमा

एजेन्सी । जर्मन क्लब बायर्न म्युनिख फिफा क्लब विश्वकप फुटबलको फाइनलमा प्रवेश गरेको छ ।

सोमबार राति भएको खेलमा इजिप्टको अल एहलीलाई २-० गोल अन्तरले हराउँदै बायर्न उपाधि नजिक पुगेको हो ।

कतारको अहमेद विन अली स्टेडियममा बायर्नलाई जित दिलाउन रोबर्ट लेवान्डोस्कीले दुई गोल गरे ।

खेलको १७ औं मिनेटमा पोलिस फरवार्ड लेवान्डोस्कीले गोल गर्दै टोलीलाई अग्रता दिलाएका थिए ।

त्यसपछि खेलको ८५ औं मिनेटमा लेवान्डोस्कीले व्यक्तिगत दोस्रो गोल गर्दै बायर्नलाई २-० को जित दिलाए ।

अब बायर्नले फाइनलमा मेक्सिकोको टिग्रेससँग खेल्नेछ ।

टिग्रेसले ब्राजिलको पाल्मेइरसलाई १-० ले हराएर बायर्नसँगको भेट पक्का गरेको हो ।