सोमपालले लिए विकेट, अरेबियन्स पराजित
काठमाडौं । नेपाली राष्ट्रिय क्रिकेट टोलीका सदस्य सोमपाल कामी आबद्द मराठा अरेबियन्सले आबुधाबी टी-१० लिगमा तेस्रो हार व्यहोरेको छ ।
मंगलबार भएको खेलमा मराठा कलन्दर्ससँग ४ विकेटले पराजित भएको हो ।
मराठाले दिएको १ सय २ रनको लक्ष्य कलन्दर्सले ८ ओभर १ बलमा ६ विकेट गुमाएर पुरा गर्यो ।
कलन्दर्सको जितमा शर्जिल खानले २८ रन जोडे ।
यस्तै बेन डुन्कले २६ रन जोड्दा कप्तान सोहिल अख्तरले २० रन बनाए ।
मराठाका यामिन अहमदजाईले २ विकेट लिए । सोमपाल, शोयब मलिक र इशान मलहोत्राले १/१ विकेट लिए।
सोमपालको यो टी-१० मा पहिलो विकेट हो । उनले कलन्दर्सका कप्तान अख्तरलाई एलबिडब्लु आउट गरे ।
सोमपालले १ ओभरमा १९ रन खर्चिएर एक विकेट लिएका हुन् ।
यस अघि पहिले ब्याटिङ गरेको मराठाले १० ओभरमा ५ विकेट गुमाएर १ सय १ रन बनाएको थियो ।
मराठाका लागि मोहमद हाफिजले ४४ रन जोड्दा शोयब मलिकले २३ रन बनाए ।
कलन्दर्सका सोहिल तान्भिरले ३ विकेट लिए ।
