सावित्राको ह्याट्रिक, एपीएफको सानदार सुरुवात

काठमाडौं । साविक विजेता एपीएफ क्लबले राष्ट्रिय महिला लिग फुटबलमा विजयी सुरुवात गरेको छ ।

बिहीबार भएको खेलमा रौतहटको चन्द्रपुर नगरपालिकालाई ६-० गोल अन्तरले हराउँदै एपीएफले सुखद सुरुवात गरेको हो ।

सातदोबाटोस्थित एन्फा कम्प्लेक्समा एपीएफलाई जित दिलाउन सावित्रा भण्डारीले ह्याट्रिक गरिन् ।

यस्तै कप्तान अनिता बस्नेत, अन्जली कुमारी योन्जन र प्रिती राईले एक एक गोल थपिन् ।

एकतर्फी बनेको खेलको १४ औं मिनेटमा सावित्राको गोलबाट एपीएफले अग्रता बनाएको थियो ।

मैदानको दायाँ भागबाट मन्जली योन्जनको पासमा सावित्राले डिबक्स भित्रबाट सहजै गोल गरिन् ।

खेलको २२ औं मिनेटमा एपीएफले अग्रता दोब्बर बनायो । मिडफिल्डर अन्जलीले कप्तान अनिताले उपलब्ध गराएको पासमा गोल गरेकी थिइन् ।

खेलको ६२ औं मिनेटमा सावित्राले व्यक्तिगत दोस्रो गोल गर्दै एपीएफलाई ३-० को अग्रता दिलाईन् । उनले कप्तान अनिताले मिलाएको पासलाई सिक्स यार्ड बक्सबाट गोल गरेको थिइन् ।

खेलको चौंथो गोल कप्तान अनिताको नाममा रह्यो । खेलको ६४ औं मिनेटमा सावित्राले डिबक्स भित्रबाट मिलाएको बललाई अनिताले वान टचमै गोल गरेकी थिइन् ।

खेलको ७२ औं मिनेटमा सावित्राले व्यक्तिगत तेस्रो गोल गर्दै ह्याट्रिक पुरा गर्दा एपीएफ ५-० ले अघि रह्यो ।

त्यसपछि खेलको ८९ औं मिनेटमा डेब्यु खेलाडी प्रिती राईले गोल गरेपछि एपीएफले ६-० को फराकिलो जित निकाल्यो ।

जितसंगै एपीएफले पहिलो खेलमै महत्वपूर्ण ३ अंक जोडेको छ ।

के भन्छन् प्रशिक्षकहरु ?

जितपछि एपीएफका प्रशिक्षक भगवती थापाले टिमले अझै सुधार गर्ने ठाउ भएको बताईन् ।

'कोरोनापछि प्रतियोगिता भयो । टिम राम्रो छ । रौतहट पनि नराम्रो हैन । प्रदर्शनले सन्तुष्ट छु,' उनले भनिन्, 'कमीकमजोरी सुधार गर्छौं । अट्याक राम्रो भएपनि स्कोरमा चुक्यौं । लिगमा अंक र गोलको ठूलो भुमिका हुन्छ ।'

चन्द्रपुरका प्रशिक्षक नुरराज काफ्लेले खेलाडीले चोट बोक्दा समस्या भएको बताए ।

'पहिलो हाफ राम्रो भयो । दोस्रो हाफमा खेलाडी घाइते भएपछि समस्या आयो । खेलाडीको फिटनेशमा पनि समस्या आयो । एपीएफको पनि राम्रो खेल भएन । पहिला धेरै तगडा थियो । पहिलो जस्तो भएन,' उनले भने, '२ महिनाको तयारी हो । उपाधिमा सोच छैन ।'

लिग अन्तर्गत नै आज विराटनगर महानगरपालिका मोरङ र वालिङ नगरपालिका स्याङ्जाबीच प्रतिस्पर्धा हुनेछ ।

महिला लिगमा तीन विभागीयसहित ७ टिमले प्रतिस्पर्धा गरिरहेका छन् ।

प्रतियोगिताको विजेताले नगद १५ लाख सहित ट्रफी प्राप्त गर्नेछ । दोस्रोले ८, तेस्रोले ५, चौथोले ३ लाख रुपैयाँ प्राप्त गर्ने एन्फाले जनाएको छ ।

प्रतियोगिताको सर्वोकृष्ट खेलाडीले स्कुटर र हरेक विधाका खेलाडीले जनही ५० हजार रुपैयाँ प्राप्त गर्नेछन् ।