आर्मीका जितेन्द्र जमल्दारमा बढुवा

काठमाडौं । विभागीय टिम त्रिभुवन आर्मी क्लबका मिडफिल्डर जितेन्द्र कार्की जमल्दारमा बढुवा भएका छन् ।

आर्मी क्लबमा आबद्ध जितेन्द्रले मंगलबार एक कार्यक्रमका बीच जमल्दारको दर्जानी चिन्ह प्राप्त गरेका छन् ।

नेपाली राष्ट्रिय फुटबल टोलीका सदस्य समेत रहेका कार्कीलाई महासेनानी ईश्वर कुमार श्रेष्ठले दर्जानी चिन्ह प्रदान गरेका थिए ।

६९ साल साउन १५ गते आर्मी क्लबमा आबद्ध भएका कार्कीले ८ वर्षको अवधिमानै जमल्दार प्राप्त गरेका हुन् ।

त्यसअघि न्युरोड टिम एनआरटीबाट खेलेका थिए ।

‘आजबाट जमल्दार भएको छु । खुसी छु,’ ३३ वर्षीय कार्कीले खेलपाटीसँग भने ।

यस्तै उनले जमल्दार भएसँगै आर्मीलाई एक पटक लिगको उपाधि दिलाउने लक्ष्य रहेको बताए ।

‘भर्खरै एएफसी लाईसेन्स प्राप्त गरेका छौं । अब, आर्मीलाई लिग जिताउने चाहना छ,’ सन् २०१८ बाट राष्ट्रिय टिम बाहिर रहँदै आएका कार्कीले भने ।

यस अघि सहिद स्मारक 'ए' डिभिजन लिगमा आर्मी उपविजेतामा सिमित रहेको थियो ।

अन्तिम खेलमा मछिन्द्र फुटबल क्लबसँग पराजित भएको आर्मी पहिलो पटक लिगको उपाधि हात पार्न असफल भएको थियो ।

केहि समय अघिमात्रै आर्मीले एएफसीले दिने एएफसी लाईसेन्स प्राप्त गरेको थियो । एएफसीका मापदण्ड पुरा गरेसँगै आर्मी नेपालमा लाईसेन्स पाउने पहिलो क्लब बन्न सफल रहेको थियो ।