खेलकुद प्रतिभा सम्मानबाट खेलाडी पुरस्कृत

काठमाडौं । युवा तथा खेलकुद मन्त्रालयले खेलकुद प्रतिभा सम्मानबाट खेलाडी सहित खेलकर्मीलाई पुरस्कृत गरेको छ ।

मंगलबार सिंहदरबारमा एक कार्यक्रमको आयोजना गरेर मन्त्रालयले ७ खेलाडी सहित विभिन्न विधाका खेलकर्मीलाई नगद सहित पुरस्कृत गरेको हो ।

खेलकुद प्रतिभा सम्मान पुरस्कारका लागि मन्त्रालयले सचिव रामप्रसाद थपलियाको संयोजकत्वमा समिति गठन गरेको थियो । सोही समितिले खेलाडी र खेलकर्मीको योगदानमा आधारित रहेर पुरस्कारका लागि छनोट गरेको हो ।

सम्मानित हुने खेलाडीमा शारीरिक सुगठनका समिर श्रेष्ठ, भारत्तोलनका बिकास थापा र एथ्लेटिक्सकी सन्तोषी श्रेष्ठ ६६ हजार ६ सय ६६ रुपैयाँ सहित सम्मानित भए ।

यस्तै, गल्फका सुवास तामाङ्ग, साईकिलिङकी लक्ष्मी मगर, तेक्वान्दोकी आयषा शाक्य र करातेका मण्डेकाजी श्रेष्ठ जनही १ लाख रुपैयाँ सहित सम्मानित भए ।

सम्मानित हुने अधिकांश खेलाडीले १३ औं दक्षिण एसियाली खेलकुद (साग)मा स्वर्ण जितेका थिए ।

यस्तै, मन्त्रालयले तेक्वान्दोका प्रशिक्षक नविन श्रेष्ठ र करातेका प्रशिक्षक कुशल श्रेष्ठलाई जनही ५० हजार सहित सम्मान गर्यो ।

यस्तै, जुडोका निर्णायक धर्मकुमार श्रेष्ठ, चिकित्सक ज्ञानेन्द्रबिक्रम शा र खेल संघबाट नेपाल गल्फ संघ समान १ लाख रुपैयाँले पुरस्कृत भए ।

खेलकुद क्षेत्रलाई ठुलो आर्थिक सहयोग गर्दै सामाजिक उत्तरदायित्व निर्वाह गरेको भन्दै ब्यापारिक संस्था कतार एयरवेज र काठमाडौं महानगरले प्रसंशापत्र प्राप्त गरे ।

कतार एयरवेजले घरेलु फुटबलको शीर्ष डिभिजनको लिगलाई मुख्य प्रायोजकको रुपमा वार्षिक झण्डै डेढ करोड रुपैयाँ सहयोग गरेको थियो । काठमाडौं महानगरले आफ्नो क्षेत्रका शीर्ष डिभिजनका क्लबलाई जनही वार्षिक १० लाख रुपैयाँ सहयोग गर्दै आएको छ ।

कार्यक्रममा राखेप सदस्य सचिव रमेशकुमार सिलवालले वर्तमान सरकारले खेलकुदमा लगानी वृद्धि गरेको बताए । उनले राष्ट्रले खेलाडीलाई गरेको सम्मानको रुपमा पुरस्कारलाई बुझ्न आग्रह गरे ।

सचिव रामप्रसाद थपलियाले राखेपले आफ्नो कोषलाई अझ फराकिलो बनाउँदै ब्यापारिक संस्थाबाट सहयोग लिन आग्रह गरे ।

उनले नयाँ ऐनले खेलकुदमा लगानीको बातावरण बनाईदिएको उल्लेख गर्दै लगानीको वृद्धि संगै पारदर्शीता समेत देखिने बताए ।

मन्त्री जगतबहादुर विश्वकर्माले खेलकुद सम्मान पुरस्कारले नयाँ पुस्ता खेलकुदमा आकर्षित हुने बताए ।

‘यो सबै खेल क्षेत्रलाई गरिएको सम्मान हो । यसले नयाँ प्रतिभालाई आमन्त्रण गरेको छ । सम्मानले नयाँ पुस्तालाई हौसला दिएको छ ।’ उनले भने ।