खेल संघको वर्गिकरण हुन्छ – खेलकुद मन्त्री विश्वकर्मा

काठमाडौं । युवा तथा खेलकुद मन्त्री जगतबहादुर विश्वकर्माले राष्ट्रिय खेलकुद परिषद् (राखेप)मा दर्ता भएका खेल संघको बर्गिकरण गरिने बताएका छन् ।

राखेपको आयोजनामा सोमबार काठमाडौंमा आयोजित कार्यक्रममा मन्त्री विश्वकर्माले राष्ट्रिय खेलकुद विकास ऐन २०७७ ले खेलको बर्गिकरणको ब्यवस्था गरेको उल्लेख गर्दै खेलकुदको विकासका लागि श्रोत, साधन र प्राथमिकताका आधारमा खेल संघ बर्गिकरण गरिने बताए ।

राखेपले नयाँ ऐनका विषयमा राखेपमा दर्ता भएका खेल संघसंग अन्तरक्रिया गर्न कार्यक्रमको आयोजना गरेको हो ।

राखेप उपाध्यक्ष शिव कोईरालाले एउटै ब्यक्तिको धेरै ठाउँमा जिम्मेवार पाएको भेटिएको उल्लेख गर्दै यस प्रथाको अन्त्य गरिने बताए । उनले केही संघको गतिविधिले खेलकुदनै बदनाम हुँदै आएको उल्लेख गर्दै खेल संघको संख्याले राज्यलाई फरक नपार्ने बताए ।

युवा तथा खेलकुद मन्त्रालयका सचिव रामप्रसाद थपलियाले नयाँ ऐनले गरेको ब्यवस्थाका विषयमा खेल संघका पदाधिकारीलाई जानकारी गराएका थिए ।

उनले नयाँ ऐन अनुसार खेलकुद र खेल संघको बदलिदो परिवेशबारे संघका पदाधिकारीलाई प्रकाश पारेका थिए ।

सचिव थपलियाले नयाँ ऐनले परिभाषित गरेका खेलाडीको परिचयदेखि संघ र राखेपले बनाउने र सार्वजनीक गर्नुपर्ने वार्षिक प्रतिवेदनबारे स्मरण गराएका थिए ।

चालू आर्थिक वर्ष सकिएको झण्डै ६ महिना बितेपनि खेल संघले राखेपमा र राखेपले मन्त्रालयमा वार्षिक प्रतिवेदन बुझाएका छैनन् ।

सचिव थपलियाले नयाँ ऐन अनुसार खेल संघ पारदर्शी तरिकाले अघि बढ्नुपर्ने बाध्यकारी व्यवस्थाका विषयमा पदाधिकारीलाई जानकारी गराएका थिए ।

उनले राज्यको लगानीले मात्र खेलकुद अघि बढ्न नसक्ने बताउँदै अन्य सरकारी तथा नीजि क्षेत्रसंग सहयोग लिन सक्नुपर्ने धारणा राखेका थिए ।

राखेप सदस्य सचिव रमेशकुमार सिलवालले स्वास्थ्य मापदण्ड पुरा गरेर खेलकुद गतिविधि अघि बढाउन संघहरुलाई आग्रह गरे । उनले खेल संघको प्रशिक्षणमा आवश्यक सहयोग गर्न राखेप तयार रहेको बताए ।

कार्यक्रममा सहभागी बनेका खेल संघका पदाधिकारीले आफ्नो खेललाई राष्ट्रिय खेलकुद प्रतियोगितामा समावेश गन अनुरोध गरेका थिए ।