रियलको लगातार चौथो जित

एजेन्सी । स्पेनिस ला लिगा फुटबलमा रियल मड्रिडले लगातार चौथो जित निकाल्ने क्रममा ईबरलाई पराजित गरेको छ ।

आईतबार राति घरेलु टोली ईबरमाथि ३–१ को जित निकाल्दै रियल मड्रिडले शीर्ष स्थानको एट्लेटिको मड्रिडमाथि दबाब कायमै राखेको छ ।

मड्रिड क्लबका दुवै टोलीको समान २९ अंक छ । गोल अन्तरका आधारमा रियल भन्दा एट्लेटिको अघि छ ।

करिम बेन्जिमाले सुरुवातमै गोल गर्दै पाहुना टोलीलाई खेलमा अग्रता दिलाएका थिए । रोड्रिगोको क्रसलाई सदुपयोग गर्दै बेन्जिमाले यस सिजन सातौ गोल पुरा गरे ।

लुका मोड्रिचले १३ औं मिनेटमा रियलको अग्रता दोब्बर बनाउने काम गरे ।

कप्तान किकी गार्सियाले इबरका लागि एक गोल गर्दै घरेलु टोलीलाई खेलमा फर्काउने कोशिश गरेका थिए । दुवै टिमलाई दोस्रो हाफमा गोलको अवसर निकाल्न कठिन रह्यो ।

लुकास भाजकेन्जले ईन्जुरी समयमा गोल गर्दै रियलको ३–१ को जित सुनिश्चित गरे ।

जित सहित जिनेदिन जिदानको रियल तालिकाको दोस्रो स्थानमा उक्लियो । रियलले शहरी प्रतिद्धन्दी एट्लेटिको भन्दा दुई खेल बढी खेलेको छ । एट्लेटिको मड्रिडले मुख्य खेलमा मंगलबार रियल सोसिडाडसंग खेल्दैछ ।

सबै प्रतियोगितामा रियलले लगातार ५ खेलमा जित निकालेको हो । १४ औं स्थानको ईबर रेलिगेशन जोन भन्दा एक अंकले माथि छ ।