प्रिमियर लिग : टोटेनहमलाई बेलको प्रतिक्षा

एजेन्सी । प्रिमियर लिग फुटबलमा आज (आईतबार) राति ४ खेल हुँदैछ ।

उपाधि होडमा रहेको टोटेनहमले घरेलु मैदानमा लेस्टर सिटीलाई आतिथ्यता प्रदान गर्दैछ ।

लिभरपुलसंग पराजित बनेपछि शीर्ष स्थान गुमाएको टोटेनहमले लेस्टरलाई पराजित गर्दै शीर्ष स्थानको एनफिल्ड क्लबसंग अंक दुरी घटाउने अवसर छ ।

टोटनहमलाई फरवार्ड ग्यारेथ बेलको प्रतिक्षा रहेको छ । उनी पछिल्लो समय क्लबको अभ्यासमा सहभागी बनेका छन् । पछिल्ला दुई खेलमा अनुपस्थित रहेका उनी आईतबार देखिन सक्नेछन् । ज्वरोका कारण उनले पछिल्ला दुई खेल गुमाएका थिए । एरिक लामेला र जेफेट तान्गङ्गा भने टोटनहमलाई उपलब्ध हुने छैनन् ।

यता लेस्टर चोट ग्रस्त खेलाडीको पुनरागमनको सम्भावनाले उत्साहीत छ । चोटबाट निको हुँदै टिमोथी कास्टगन र ड्यानियल अमार्टे लेस्टरको टोलीमा फर्कन सक्नेछन् ।

निलम्बन पुरा गर्दै डिफेन्डर जोनी इवान्स लेस्टरको टिममा रहनेछन् । टोटेनहमलाई हराउँदै लेस्टरलाई समेत तालिकाको दोस्रो स्थानमा उक्लिने मौका छ ।

अन्य खेलमा, म्यान्चेष्टर युनाईटेडले लिड्सलाई आतिथ्यता प्रदान गर्दा सेफिल्ड युनाईटेड ब्राईटनको भ्रमणमा निस्कनेछ । आईतबारको अन्तिम एक खेलमा एन्टन भिल्ला भने रेलिगेशनबाट बच्न संघर्षरत वेस्ट ब्रोमको भ्रमणमा निस्कनेछ ।