बसन्तलाई कोरोना, ऐरी र मल्ललाई चोट

काठमाडौं । नेपालको राष्ट्रिय टिममा रहेका खेलाडीको सहभागिता रहने गौतमबुद्ध कप क्रिकेट प्रतियोगिता शनिबारबाट सुरु हुँदै छ ।

तीन टिमको सहभागी रहने प्रतियोगिता चितवनको भरतपुरमा निर्माणाधीन गौतमबुद्ध अन्तराष्ट्रिय क्रिकेट रंगशालाको नमुना मैदानमा हुनेछ ।

प्रतियोगितामा बागमती टिम, नारायणी टिम र राप्ति टिमले सिंगल राउण्ड रोबिनको आधारमा खेल्नेछन् ।

बागमती टिमको कप्तानी ज्ञानेन्द्र मल्लले गर्ने छन् । पारस खड्काले नारायणी तथा बिनोद भण्डारीले राप्तीको नेतृत्व गर्नेछन् ।

प्रतियोगितामा राष्ट्रिय खेलाडी सहित अन्य नयाँ चितवनका युवा खेलाडीको सहभागिता रहने छ ।

कोरोना माहामारी पछि पहिलो पटक राष्ट्रिय क्रिकेट टिमले बन्द प्रशिक्षण गरेका खेलाडी, अन्य उमेर समूहका खेलाडी र चितवनका केही खेलाडी समावेश गर्दै प्रतियोगिता खेल्न लागेको हो ।

तर क्याम्पमा बोलाइएका तीन राष्ट्रिय खेलाडी भने प्रतियोगितामा उपस्थित हुने छैनन् । उपकप्तान दीपेन्द्र ऐरी, भेट्रान स्पिनर बसन्त रेग्मी र युवा ब्याट्सम्यान कुशल मल्ललाई गौतमबुद्ध कपमा देख्न पाईने छैन ।

उपकप्तान ऐरी र कुशल चोटका कारण प्रतियोगिता गुमाउने भएका हुन् । कुशललाई बन्द प्रशिक्षणमा फिल्डिङको क्रममा देब्रे हातमा चोट लागेको छ । सोही चोटका कारण उनले यस प्रतियोगिता गुमाउने छन् ।

यस्तै ऐरीलाई समेत खुट्टाको चोट छ । खुट्टामा समस्या देखिएको कारण उनले चितवनमा खेल्न नसक्ने भएका हुन् ।

यता बसन्त रेग्मी भने बुधबार कोरोना पोजेटिभ देखिएको कारण प्रतियोगितामा सहभागिता नहुने भएका हुन् ।

लामो समयदेखि नेपाली खेलाडीले प्रतिस्पर्धात्मक खेल खेल्न नपाएको भन्दै बागमती प्रदेश क्रिकेट संघले प्रतियोगिता आयोजना गर्न लागेको हो ।

यस प्रतियोगिताले आगामी पुस ११ बाट हुने राष्ट्रिय प्रतियोगिता प्रधानमन्त्री कपमा सहयोग पुग्ने आश गरिएको छ । तर प्रतियोगिता नजिकै रहेको कारण कोरोनबाट बच्नु खेलाडीका लागि चुनौती छ ।

आयोजक बागमती प्रदेश क्रिकेट संघले कोरोना भाईरसको स्वास्थ्य सुरक्षाको मापदण्डलाई पालना गर्दै प्रतियोगिता सञ्चालन गरिनेब ताएको छ । कोरोना माहामारीपछि नेपाली राष्ट्रिय खेलाडीले पहिलो पटक प्रतियोगिता खेल्नेछन् ।

आयोजकले प्रतियोगिता टी–ट्वान्टी र एकदिवसीय फम्र्याट मध्य एक हुने जनाएको छ । खेलको दिन मैदानको अवस्था हेरेर फम्र्याट निर्धारण हुने बताइएको छ ।

बागमती टिम :

ज्ञानेन्द्र मल्ल (कप्तान), अनिल शाह, सोमपाल कामी, राशिद खान, ललित राजबंशी, सागर ढकाल, रोहित पौडेल, पवन सर्राफ, सुनिल धमला, बिक्रम सोब, प्रदीप ऐरी, भिम शार्की, आकाश थापा र संघर्ष ढकाल

नारायणी टिम :

पारस खड्का (कप्तान), सुवास खकुरेल, करण केसी, किशोर महतो, सुशन भारी, सहाब आलम, आरिफ शेख, सन्दीप जोरा, रित गौतम, सिद्दान्त लोहनी, इशान पाण्डे, राजु रिजाल, दिपेश श्रेष्ठ र बिबेक यादब

राप्ती टिम :

बिनोद भण्डारी (कप्तान), कुशल भुर्तेल, अविनास बोहरा, कमल ऐरी, सुर्य तमाङ, भुवन कार्की, शरद भेषावकर, लोकेश बम, आशिफ शेख, जितेन्द्र मुखिया, अमित श्रेष्ठ, सुमित महर्जन, हरि चौहान र सप्निल अधिकारी