सागको खर्च विवरण – आयोजना भन्दा पूर्वाधारमा खर्च

काठमाडौं । १३ औं दक्षिण एसियाली खेलकुद प्रतियोगिता (साग)को आयोजना भन्दा पूर्वाधारमा धेरै रकम खर्च भएको देखिएको छ ।

राष्ट्रिय खेलकुद परिषद् (राखेप)का सदस्य सचिव रमेशकुमार सिलवालले आईतबार सार्वजनीक गरेको खर्च विवरणमा प्रतियोगिता आयोजना भन्दा पूर्वाधारमा धेरै खर्च गरेको देखिएको हो ।

सदस्य सचिव सिलवालले साग खेलकुद कार्यक्रममा १ अर्व ३१ करोड ७८ लाख ४३ हजार ६१ रुपैयाँ र सागको पूर्वाधारमा विगतका वर्षदेखि हालसम्म २ अर्व ८६ करोड १४ लाख २८ हजार ९ सय ७३ रुपैयाँ खर्च देखिएको हो ।

सदस्य सचिव सिलवालले भुकम्पले प्रभावित बनेको खेलकुद पूर्वाधारलाई नयाँ स्वरुपमा ल्याउँदा खर्च धेरै भएको बताए ।

‘पूर्वाधार बनाएपछि लगानी हुन्छ । भुकम्पपछिको दशरथ रंगशालाको अवस्था कस्तो थियो भन्नेमा सबै जानकार छौ । नयाँ स्वरुपमा ल्याउँदा खर्च धेरै हुनु स्वभाविक हो ।’ पत्रकार सम्मेलनमा उनले भने ।

उनले सागको समयमा नेपालको खेलकुद क्षेत्रमा अन्तराष्ट्रिय स्तरको रंगशाला बनाउन सफल भएको दाबी गरे ।

‘चार वर्षभित्र सातै प्रदेशमा अन्तराष्ट्रिय स्तरको रंगशाला बनाउने अभियानमा अघि बढेका छौ । चार वर्षे कार्यकालमा सो लक्ष्य पुरा हुन्छ ।’ उनले भने ।

उनले पूर्वाधारको स्तर लगानी अनुसार हुने उल्लेख गर्दै सुविधायुक्त पूर्वाधार निर्माण गर्दा धेरै लगानी लाग्नु स्वभाविक भएको बताए ।

पूर्वाधारतर्फ दशरथ रंगशालामा गत आर्थिक वर्षदेखि अहिलेसम्म ६८ करोड रुपैयाँ, सातदोबाटोको हिटिङ पौडी पोखरी निर्माणमा २२ करोड ९२ लाख रुपैयाँ, सातदोबाटोको स्क्वास कोर्ट निर्माणमा ७ करोड ८० लाख रुपैयाँ, सातदोबाटोको तेक्वान्दो तथा कराँते एकेडेमी निर्माणमा १४ करोड रुपैयाँ, च्यासल रंगशाला निर्माणमा २६ करोड रुपैयाँ, लन टेनिस कोर्ट निर्माणमा ३ करोड ९३ लाख रुपैयाँ, लैनचौरको कभर्डहल मर्मतमा ३४ लाख, कीर्तिपुरको क्रिकेट मैदान तथा कभर्डहल मर्मत तथा निर्माणमा ३३ करोड ८१ हजार १ सय १ रुपैयाँ, पोखरा रंगशाला निर्माणमा १ अर्व ४ करोड, ५६ लाख, ८८ हजार ४ सय ८६ रुपैयाँ, पोखराको साग भेन्यु निर्माणमा ४ करोड ६० लाख रुपैयाँ र धनुषा कभर्डहल मर्मतमा ३५ लाख खर्च लागेको देखिएको छ ।

सागको पूर्वाधार भन्दा आधा बढी रकममात्र प्रतियोगितामा खर्च भएको देखिएको छ ।

सार्वजनीक हिसाब अनुसार केन्द्रिय सचिवालय खर्चमा ६ करोड ७४ लाख ५६ हजार ४ सय ७९ रुपैयाँ, पोखराको सचिवालयमा ७ करोड ६२ लाख ९८ हजार २ सय २४, जनकपुरको सचिवालयमा ८० लाख ३७ हजार २ सय १२ र बाँकी रकम विभिन्न समितीले खर्च गरेको देखिएको छ ।

साग आयोजनाका लागि राखेपले झण्डै साढे ५ अर्व रुपैयाँ सरकारसंग माग गरेको थियो । सरकारले झण्डै ४ अर्व रुपैयाँ सागको आयोजना र पूर्वाधारमा खर्च गर्न दिएको थियो । राखेपले साग कार्यक्रममा १ अर्व ३१ करोड ७८ लाख ४३ हजार ६१ रुपैयाँ र पूर्वाधारमा २ अर्व ८६ करोड १४ लाख, २८ हजार ९ सय ७३ रुपैयाँ गरि ४ अर्व १७ करोड ९२ लाख ७२ हजार ३४ रुपैयाँ खर्च गरेको देखिएको छ ।

प्रतियोगिता सम्पन्न भएको झण्डै एक वर्षपछि राखेप सदस्य सचिव सिलवालले सागको खर्च विवरण सार्वजनीक गरेका हुन् । साग आयोजना तथा सञ्चालन सम्बन्धि कार्यविधिमा प्रतियोगिता सम्पन्न भएको तीन महिनाभित्र खर्च विवरण सार्वजनीक गर्नुपर्ने उल्लेख छ । तर सदस्य सचिव सिलवालले काठमाडौं, जनकपुर र पोखराबाट हिसाब किताब समयमा नआउदा र कोभिडको महामारीका कारण समयमा हिसाब सार्वजनीक गर्न ढिलाई भएको दाबी गरे ।