काठमाडौं । फुटबलको विकास तथा विस्तार गर्नको लागि अखिल नेपाल फुटबल संघ (एन्फा) र नेपाल नगरपालिका संघबीच सम्झौता पत्रमा हस्ताक्षर भएको छ ।
सातदोबाटोस्थित एन्फा भवनमा शुक्रबार नगरपालिका संघ र एन्फाबीच सम्झौता पत्रमा हस्ताक्षर भएको हो ।
एन्फा अध्यक्ष कर्मा छिरिङ शेर्पा र नगरपालिका संघका अध्यक्ष तथा धुलिखेल नगरपालिका प्रमुख अशोक कुमार ब्यन्जु श्रेष्ठले दुई वर्षे सम्झौतामा हस्ताक्षर गरे ।
सम्झौता आवश्यकता अनुसार थप गरिने समेत बताईएको छ ।
एन्फाले ‘ऐतिहासिक सम्झौता’ बताएको यस सम्झौतामा मुख्य १० बुदाहरु समेटिएका छन् । जसमा नगरपालिकाले प्रतियोगिता गराउने, ब्यवस्थापन गर्ने, पूर्वाधार निर्माण गर्न जस्ता कार्यमा एन्फाको प्राविधिक सहयोग रहने छ ।
सम्झौता पत्रमा खुलस्त रुपमा सबै उल्लेख नगरिएपनि पहिलो पक्ष नगरपालिका संघ रहने र दोस्रो पक्ष एन्फा रहनेछ ।
सम्झौतासँगै बनेको कार्यगठन समितिमा एन्फा र नगरपालिका समान ३ सदस्य रहनेछन् । कार्यसमितिले अर्काे हप्ताबाटनै सम्झौता पत्रमा भएका १० बुदाको कार्यन्वयन गर्नतर्फ लाग्ने बताईएको छ ।
यस सम्झौताले देशभर रहेका २ सय ९३ स्थानिय निकाय फुटबलसँग जोडिएको छ । र, स्थानिय निकायमा फुटबल विकासको बाटो खुलेको बताईएको छ ।
सम्झौता अनुसार सबैभन्दा महत्वपूर्ण बुदाको रुपमा ‘एक नगरपालिका एक फुटबल मैदान’लाई लिईएको छ ।
दुबै पक्षले यस सम्झौता ‘एक नगरपालिका एक फुटबल मैदान’ नारासहित अगाडी बढ्ने बताएका छन् ।
यस्तै जिल्ला फुटबल संघहरुलाई आर्थिक अनुदान दिनका लागि नगरपालिकाहरुको बजेट निर्माण र बिनियोजनका आवश्यक पहल गर्नेछ ।
नगरपालिकाले सात वटै प्रदेशमा अन्तर नगरपालिका तथा नगरपालिका भित्रका क्लब, विद्यालय स्तमा फुटबल प्रतियोगिताहरु सञ्चानल गर्नको लागि पहल गर्नेछ ।
यस्तै ग्रासरुट फुटबल संचालन गर्नका लागि नगरपालिकाले आवश्यक सहयोग गर्ने देखि फुटबलमा योगदान पुर्याउने खेलाडी, प्रशिक्षक, रेफ्री आदि सरोकारवाला नगरपालिकामा पुरस्कृत गर्नका लागि नीतिगत ब्यवस्था र पहल गर्ने बताईएको छ ।
कार्यक्रममा बोल्दै एन्फा अध्यक्ष शेर्पाले नगरपालिकाकै सहयोगमा पहिलो पटक मोफसलमा अन्तराष्ट्रिय महिला साफ प्रतियोगिता आयोजना गर्न सफल भएको बताए ।
उनले विगत लिगमा काठमाडौं नगरपालिका, ललितपुर उपमहानगरपालिकाले ए डिभिजन क्लबमा गरेको योगदानको स्मरण गर्दै यस सम्झौताले फुटबलमा नयाँ आयाम भित्राएको बताउँदै यस सम्झौता कार्यान्वयन गर्न सके कोशेढुंगा सावित हुने बताए ।
यस्तै नगरपालिका संघका अध्यक्ष श्रेष्ठ ले नयाँ बनेको खेलकुद ऐनमा केन्द्रिय सरकार हाबी भएको बताउँदै दुई संस्थाको सहकार्यले फुटबल विकासमा नयाँ आयम बढाउने बताए ।
एन्फाका बरिष्ठ उपाध्यक्ष पंकज विक्रम नेम्बाङले नगरपालिकासँग सम्झौता गर्न अध्यक्ष कर्माले गरेको मेहनतलाई धन्यवाद दिँदै यस्ता कार्यक्रम निरन्तर रुपमा संचालन हुन पाए देशको फुटबलले फड्को मार्ने बताए ।
